हिसानको इतिहासमै पहिलो निर्वाचन, नयाँ नेतृत्वलाई व्यापक समर्थन

महेश सिंह लहान – उच्च शिक्षालय तथा उच्च माध्यमिक विद्यालय संघ, नेपाल (हिसान) को नवौँ महाधिवेशनबाट नयाँ नेतृत्व चयन भएको छ। काठमाडौँको बुढानिलकण्ठस्थित पार्क भिलेज रिसोर्टमा मिति २०८२ साल पौष ११ र १२ गते सम्पन्न महाधिवेशनको निर्वाचनमार्फत काठमाडौँस्थित ह्वाइट हाउस कलेजका संस्थापक प्रिन्सिपल तथा शिक्षाविद् युवराज शर्माको अध्यक्षतामा राष्ट्रिय कार्य समिति अत्यधिक बहुमतसहित चयन भएको हो।

निर्वाचनबाट स्वागत श्रेष्ठ र टंकराज आचार्य वरिष्ठ उपाध्यक्षमा निर्वाचित भएका छन् भने लहानस्थित लहान एभरेष्ट कलेजका संस्थापक तथा कलेज प्रमुख धरणीधर अधिकारीसहित ११ जना उपाध्यक्ष चयन भएका छन्। यससँगै ६३ सदस्यीय राष्ट्रिय कार्य समिति गठन भएको छ।
हिसानको इतिहासमा पहिलो पटक निर्वाचन प्रक्रियामार्फत कार्य समिति चयन हुनु विशेष उपलब्धि मानिएको छ। यसले संस्थाभित्र लोकतान्त्रिक अभ्यासलाई संस्थागत गरेको सरोकारवालाहरूको भनाइ छ।

मधेस प्रदेशको प्रतिनिधित्व गर्दै जनकपुरबाट बाबुसाहेब यादव र सञ्जिवकुमार ठाकुर तथा वीरगञ्जबाट मुकेशकुमार गुप्ता केन्द्रीय सदस्यमा निर्वाचित भएका छन्। त्यस्तै, धरणीधर अधिकारी मधेस प्रदेशबाट एक मात्र सर्वसम्मत उम्मेदवारका रूपमा राष्ट्रिय उपाध्यक्ष पदमा अत्यधिक मतसहित निर्वाचित भएका छन्।
नवनिर्वाचित पदाधिकारी तथा सदस्यहरूलाई हार्दिक बधाई ज्ञापन गर्दै आगामी कार्यकाल सफल र उपलब्धिमूलक रहने अपेक्षा व्यक्त गरिएको छ।