महेश सिंह लहान सिरहा – जलवायु परिवर्तनका बढ्दो असरबारे समुदायस्तरमा सचेतना फैलाउने उद्देश्यले आयोजित जनचेतना र्याली तथा अन्तरक्रिया कार्यक्रम सम्पन्न भएको छ। स्थानीय सरकारको समन्वय, कृषक समूहको आयोजना तथा केयर नेपालको आर्थिक सहयोगमा कार्यक्रम सञ्चालन गरिएको हो।
कार्यक्रममा वडा अध्यक्ष रामचन्द्र चौधरी, कार्यपालिका सदस्य किरण राय दनुवार, राष्ट्रिय कृषक समूह महासंघ नेपालका फिल्ड अफिसर उमेशनन्दन चौधरी, जलवायु च्याम्पियन मिना सिंह र अनिता सिंह, अभियन्ता प्रमोद ठाकुर लगायतको सहभागिता रहेको थियो।
चार वटा कृषक समूहका ४८ किसान सहभागी कार्यक्रममा जलवायु परिवर्तनका कारण कृषि क्षेत्रमा देखिएका चुनौती, वातावरण संरक्षण तथा विषादीरहित कृषि उत्पादनका विषयमा छलफल गरिएको थियो। सहभागीहरूले जलवायु अनुकूल कृषि अभ्यास अपनाउनुपर्ने आवश्यकता औंल्याएका थिए।
अन्तरक्रियामा सहभागी महिला किसानहरूले यस्ता कार्यक्रममार्फत सुरक्षित कृषि प्रणाली, पोषणयुक्त खाद्य उत्पादन तथा स्वास्थ्यसँग सम्बन्धित जानकारी प्राप्त भएको बताए। उनीहरूले रासायनिक विषादीको प्रयोग घटाउँदै जैविक तथा वातावरणमैत्री खेतीतर्फ आकर्षित भएको अनुभव सुनाए।
वडा अध्यक्ष चौधरीले जलवायु परिवर्तनको असर न्यूनीकरणका लागि स्थानीय तह, किसान र सरोकारवाला संस्थाबीच सहकार्य आवश्यक रहेको बताए। उनले समुदायस्तरमा सञ्चालन हुने यस्ता कार्यक्रमले किसानमा चेतना अभिवृद्धि गर्न महत्वपूर्ण भूमिका खेलेको उल्लेख गरे।
आयोजकका अनुसार कार्यक्रमले जलवायु परिवर्तनप्रति किसानको बुझाइ बढाउनुका साथै दिगो कृषि प्रणाली प्रवर्द्धनमा सहयोग पुर्याएको छ। सहभागीहरूले यस्ता कार्यक्रमलाई आगामी दिनमा पनि निरन्तरता दिन आग्रह गरेका छन्।
Discussion about this post