गणतन्त्र दिवसको अवसरमा रक्तदान कार्यक्रम, ३५ भन्दा बढीले गरे रक्तदान

महेश सिंह लहान सिरहा – गणतन्त्र दिवस–२०८३ को अवसरमा श्री बर्छवा सामुदायिक युवा मञ्च, लहान–२२ बर्छवाद्वारा आयोजित रक्तदान कार्यक्रममा ३५ जना भन्दा बढी व्यक्तिले रक्तदान गरेका छन्।

श्री आधारभूत विद्यालय बर्छवा परिसरमा सम्पन्न कार्यक्रममा स्थानीय युवा, समाजसेवी तथा विभिन्न क्षेत्रका नागरिकहरूको उत्साहजनक सहभागिता रहेको थियो। कार्यक्रमलाई नेपाल रेडक्रस सोसाइटी, जिल्ला रक्तसञ्चार सेवा केन्द्र लहानले प्राविधिक सहयोग गरेको थियो।

क्लबका अध्यक्ष दिलीप कुमार चौधरीले रगतको अभावमा कुनै पनि बिरामीले समस्या भोग्न नपरोस् भन्ने उद्देश्यले रक्तदान कार्यक्रम आयोजना गरिएको बताए। उनले कार्यक्रममा ३५ जना भन्दा बढी व्यक्तिले स्वेच्छिक रक्तदान गरेको जानकारी दिए।

अध्यक्ष चौधरीका अनुसार संस्थाले विगतदेखि नै रक्तदान, सरसफाइ, जनचेतनामूलक अभियान तथा विभिन्न सामाजिक कार्यहरू निरन्तर सञ्चालन गर्दै आएको छ। आगामी दिनमा पनि समाज हितका कार्यक्रमलाई निरन्तरता दिइने उनले बताए।

रक्तदान जीवनदान भएकाले यस्ता कार्यक्रमले मानव जीवन बचाउन महत्वपूर्ण योगदान पुर्‍याउने सहभागीहरूको भनाइ रहेको थियो। स्थानीय युवाको सक्रियतामा सम्पन्न कार्यक्रमले सामाजिक उत्तरदायित्व र मानवीय सेवाको उत्कृष्ट उदाहरण प्रस्तुत गरेको आयोजकले जनाएको छ।