विद्यार्थीको सुरक्षामाथि प्रश्न,परागन स्कुल बस तोडफोड ब्यक्तीलाई कार्वाहीको माग

महेश सिंह लहान- शैक्षिक तथा खेलकुदजस्ता सकारात्मक गतिविधिमाथि नै अराजकता देखिन थालेपछि लहानमा विद्यालय सुरक्षा र व्यवस्थापनबारे गम्भीर प्रश्न उठेको छ। परागन स्कुल लहानको बस तोडफोड भएको घटनाप्रति विद्यालय प्रशासन, विद्यार्थी संघ–संगठन तथा सरोकारवाला निकायले गम्भीर चिन्ता व्यक्त गरेका छन्।
विद्यालय र विद्यार्थीका संघ–संगठनको संयुक्त आयोजनामा सञ्चालन गरिएको खेलकुद प्रतियोगिता क्रममा उत्पन्न अराजक गतिविधिले स्थिति नियन्त्रणबाहिर गएको बताइएको छ। प्रतिस्पर्धात्मक उत्सवका रूपमा सञ्चालन हुनुपर्ने खेलकुद कार्यक्रम केही समूहको उग्र व्यवहारका कारण हिंसात्मक घटनामा परिणत भएको सरोकारवालाको भनाइ छ।
शिक्षालय र विद्यार्थीलाई लक्षित गरी गरिएको यस प्रकारको तोडफोडले विद्यालयको शैक्षिक वातावरणमा नकारात्मक असर पार्नुका साथै विद्यार्थीहरूको सुरक्षामाथि समेत गम्भीर चुनौती खडा गरेको छ। घटनाका कारण अभिभावकहरू समेत चिन्तित बनेका छन्।
घटना कसरी र किन हिंसात्मक बनेको हो भन्ने विषयमा निष्पक्ष छानबिन गर्न माग गरिएको छ। साथै, बस तोडफोडमा संलग्न व्यक्तिहरूको पहिचान गरी कानुनअनुसार कडा कारबाही गर्नुपर्ने मागसमेत उठाइएको छ।
स्थानीय प्रशासन र सम्बन्धित निकायले विद्यालय क्षेत्रलाई संवेदनशील क्षेत्रका रूपमा लिँदै यस्ता अराजक गतिविधि दोहोरिन नदिन तत्काल प्रभावकारी सुरक्षा व्यवस्था गर्नुपर्नेमा सरोकारवालाहरूले जोड दिएका छन्।