ग्रामीण नागरिकको आँखाको उपचारमा पहुँच बढाउँदै बर्छवा सामुदायिक युवा मञ्च

महेश सिंह,लहान सिरहा-सिरहाको लहान नगरपालिका–२२ बर्छवामा आयोजित निःशुल्क आँखा जाँच शिविरबाट करिब तीन सय बिरामीलाई सेवा प्रदान गर्ने लक्ष्य राखिएको छ। श्री बर्छवा सामुदायिक युवा मञ्चको आयोजनामा श्री आधारभूत विद्यालय, बर्छवाको परिसरमा सोमबार शिविर सञ्चालन गरिएको हो।

ग्रामीण तथा विपन्न समुदायका नागरिकलाई आँखासम्बन्धी स्वास्थ्य सेवामा सहज पहुँच पुर्‍याउने उद्देश्यले आयोजना गरिएको शिविरमा मोतीबिन्दुका बिरामी पहिचान गरी करिब एक सय जनाको निःशुल्क शल्यक्रिया गर्ने लक्ष्य रहेको शिविर प्रमुख राजकुमार यादवले जानकारी दिनुभयो।

शिविरको सुरुआत ९२ वर्षीय स्थानीय वंशीलाल चौधरीको आँखा परीक्षण गरेर गरिएको मञ्चका अध्यक्ष प्राध्यापक दिलीप चौधरीले जानकारी दिनुभयो। उहाँका अनुसार आर्थिक अभाव तथा स्वास्थ्य सेवामा पहुँचको कमीका कारण उपचारबाट वञ्चित हुन सक्ने ज्येष्ठ नागरिक, अपाङ्गता भएका व्यक्ति, अशक्त, गरिब, दलित, सीमान्तकृत तथा विपन्न समुदायलाई लक्षित गरी शिविर आयोजना गरिएको हो।

शिविरमा आँखासम्बन्धी विभिन्न समस्याको परीक्षण गर्नुका साथै मोतीबिन्दुको शल्यक्रिया आवश्यक पर्ने बिरामीको पहिचान गरिनेछ। शल्यक्रियाका लागि छनोट भएका बिरामीको आवश्यक प्रयोगशाला परीक्षण निःशुल्क गरिने तथा औषधि र चस्मा सुपथ मूल्यमा उपलब्ध गराइने आयोजकले जनाएको छ।

शिविरमा वित्तीय सहयोग सीबीएम जर्मनीको रहेको छ भने प्राविधिक सहयोग नेपाल नेत्रज्योति संघ, लहान आँखा तथा कान उपचार प्रणाली र सगरमाथा चौधरी आँखा अस्पताल, लहानले गरेका छन्।

शिविर प्रमुख यादवका अनुसार शिविरमा आठ जना स्वास्थ्यकर्मी तथा प्राविधिक उपचार सेवामा खटिएका छन्। उपचार टोलीमा सुष्मा साह, राजकुमार यादव, वीरेन्द्र साह, अजय तामाङ, तेजनारायण चौधरी, प्रतिभा चौधरी र निभा चौधरीलगायतका स्वास्थ्यकर्मी तथा प्राविधिक सहभागी छन्।

शिविरमा सहभागी हुने बिरामीका लागि आयोजकको सहयोगार्थ ५० रुपैयाँ दर्ता शुल्क निर्धारण गरिएको छ। यस्तै, मोतीबिन्दुको शल्यक्रियाका लागि छनोट भएका बिरामीले खाना तथा फर्कने खर्च आफैँले व्यवस्था गर्नुपर्ने जनाइएको छ।

मञ्चका अध्यक्ष चौधरीले संस्थाले सामाजिक उत्तरदायित्वअन्तर्गत मानवहितका विभिन्न कार्यक्रम सञ्चालन गर्दै आएको बताउनुभयो। उहाँले गाउँमै स्वास्थ्य सेवा उपलब्ध गराएर आर्थिक रूपमा कमजोर तथा उपचारको पहुँचबाट टाढा रहेका नागरिकलाई समयमै रोग पहिचान र उपचारको अवसर प्रदान गर्नु शिविरको मुख्य उद्देश्य रहेको उल्लेख गर्नुभयो। आयोजकले आँखासम्बन्धी समस्या भएका स्थानीय बासिन्दालाई शिविरमा सहभागी भई स्वास्थ्य परीक्षण गराउन आग्रह गरेको छ।