धार्मिक पर्यटन प्रवर्द्धनका लागि विश्व हिन्दू परिषद् नेपालको धार्मिक यात्रा,सलहेश फूलबारीमा टोलीलाई स्वागत

महेश सिंह,लहान सिरहा-विश्व हिन्दू परिषद् नेपाल, सुदूरपश्चिम प्रदेशको आयोजनामा नेपालका प्रमुख धार्मिक तथा सांस्कृतिक स्थलहरूको दर्शन तथा धार्मिक पर्यटन प्रवर्द्धन गर्ने उद्देश्यले धार्मिक यात्रा सुरु गरिएको छ।

धार्मिक यात्रामा निस्किएको टोलीले सिरहाको ऐतिहासिक तथा धार्मिक महत्व बोकेको सलहेश फूलबारीको भ्रमण गरेको छ। भ्रमणका क्रममा टोलीलाई लहानमा विश्व हिन्दू परिषद् नेपाल, सिरहाका पदाधिकारी, स्थानीय जनप्रतिनिधि, समाजसेवी तथा युवाहरूले स्वागत गरेका थिए।

महासंघका केन्द्रीय सचिव महेन्द्र पन्तको नेतृत्वमा आएको धार्मिक यात्राको टोलीलाई विश्व हिन्दू परिषद् नेपाल सिरहाका जिल्ला अध्यक्ष शिवदेव साह, कोषाध्यक्ष ज्ञानेन्द्र विक्रम यादव, शिवराम यादव, पवन यादव, फूलो मण्डललगायतले स्वागत गरेका हुन्।

त्यसैगरी लहान नगरपालिका–२२ का वडाध्यक्ष श्याम अधिकारी थारू, सलहेश फूलबारी धार्मिक वन समूहका सचिव रामकुमार चौधरी, युवा समाजसेवी जयप्रकाश यादव, शैलेन्द्रकुमार साह, कृष्णकुमार साहलगायत स्थानीय युवाहरूको सहभागिता रहेको थियो।

धार्मिक यात्राका क्रममा नेपालका प्रमुख धार्मिक तथा सांस्कृतिक स्थलहरू लुम्बिनी, जनकपुरधाम, बराहक्षेत्र र देवघाटलगायत स्थानको भ्रमण गरिने कार्यक्रम रहेको छ। टोलीले सलहेश फूलबारीको दर्शनपछि बराहक्षेत्रतर्फ प्रस्थान गरेको हो।

केन्द्रीय सचिव महेन्द्र पन्तका अनुसार धार्मिक यात्रा १३ गतेदेखि १७ गतेसम्म सञ्चालन हुने र निर्धारित कार्यक्रमअनुसार टोली पुनः फर्किने जानकारी दिनुभयो।

सिरहाको सलहेश फूलबारी ऐतिहासिक, धार्मिक तथा सांस्कृतिक दृष्टिले महत्वपूर्ण स्थल मानिन्छ। यहाँको भ्रमणले धार्मिक पर्यटकीय क्षेत्रको पहिचान र प्रवर्द्धनमा समेत सहयोग पुग्ने विश्वास आयोजक तथा स्थानीय अगुवाहरूले व्यक्त गरेका छन्।

धार्मिक पर्यटनको विकास, सनातन संस्कृतिको संरक्षण तथा धार्मिक स्थलहरूको महिमा प्रचारप्रसार गर्ने उद्देश्यले यात्रा आयोजना गरिएको आयोजकले जनाएको छ। यस्ता कार्यक्रमले विभिन्न प्रदेशका धर्मावलम्बीबीच सांस्कृतिक सम्बन्ध, धार्मिक सद्भाव र आपसी एकतालाई थप मजबुत बनाउने अपेक्षा गरिएको छ।