प्रविधिको सही प्रयोग,हिंसा अन्त्य’-लैंगिक न्यायका संवाहक महिला

महेश सिंह लहान सिरहा- “प्रविधिको सही प्रयोग गरौँ, लैंगिक हिंसा अन्त्य गरौँ” भन्ने मूल नारा तथा “व्यवस्था मात्र होइन, सोचमा गरौँ सुधार; युवा/महिला नेतृत्व नै हो सामाजिक रूपान्तरणको आधार” भन्ने संदेशसहित १६ दिने अन्तर्राष्ट्रिय लैंगिक हिंसा विरुद्धको अभियानको पाँचौँ दिन महिला मानव अधिकार रक्षकहरूको अन्तर्राष्ट्रिय दिवस जनकपुरधाममा विशेष कार्यक्रमसहित मनाइएको छ।

कार्यक्रमको मुख्य आकर्षण हिंसा भोगेर पनि आत्मविश्वास पुनःस्थापित गर्दै समुदायमै पुनः फर्किएका महिला पीडितलाई सम्मान गर्ने तथा दीप प्रज्वलन गर्ने कार्यक्रम रहेको थियो।
उनीहरूलाई “परिवर्तनका संवाहक” का रूपमा चिन्दै समाजमा पुनःसम्मिलनका लागि निरन्तर प्रयास गरिरहेको उल्लेख गरियो।

कार्यक्रम महिला मानव अधिकार रक्षक सञ्जाल मधेस प्रदेशको आयोजनामा तथा ओरेक, मुक्ति नेपाल, महिला मैत्री समाज र प्रेरणा महिला समूहको सहकार्यमा सम्पन्न भएको हो।

“हिंसा भोग्ने महिलाको क्षमता, साहस र पुनःउठ्ने शक्ति स्वयं परिवर्तनको आधार हो”

कार्यक्रमको अध्यक्षता सञ्जालकी अध्यक्ष अधिवक्ता रेखा झाले गरेकी थिइन्। प्रमुख अतिथिका रूपमा धनुषा जिल्ला समन्वय समितिका प्रमुख राजनन्दन मण्डल तथा अतिथिका रूपमा मिथिला नगरपालिका उपप्रमुख सुनिता सिंह बुढाथोकी उपस्थित थिए।

सभाध्यक्ष झाले हिंसापीडित महिलाको पुनःस्थापना, मनो–सामाजिक उपचार, संरक्षण संयन्त्र, तथा मानव अधिकार रक्षकहरूको सुरक्षा सुनिश्चितता अहिलेको मुख्य चुनौती रहेको बताइन्।
उनका अनुसार, “हिंसा रोकिनुको आधार कानुन मात्र होइन, समाजको सोच परिवर्तन हो। त्यसका लागि महिला अधिकारकर्मीको सुरक्षा ग्यारेन्टी अत्यावश्यक छ।”

कार्यक्रममा जिल्ला समन्वय समितिकी उपप्रमुख संगिता ठाकुर, महिला मानव अधिकार रक्षकहरू, युवा अधिकारकर्मी, हिंसा प्रभावित महिला, पत्रकार तथा विभिन्न सरोकारवाला निकायका प्रतिनिधिहरूको उल्लेख्य उपस्थिति थियो।