सिरहामा मुसहर युवाको ‘शिक्षा–जागरण’ अभियान तेस्रो चरणमा

महेश सिंह लहान-लहान नगरपालिका–१७ स्थित बलानसैरमा मुसहर युवा सञ्जालले सञ्चालन गर्दै आएको शिक्षा–मुखी जनचेतना कार्यक्रम तेस्रो चरणमा प्रवेश गरेको छ। “हमर बच्चा हमर प्राण, शिक्षा मे दियौ योगदान” भन्ने मूल नारासहित चालु गरिएको अभियानले मुसहर समुदायका बालबालिकालाई नियमित विद्यालय उपस्थित गराउने लक्ष्यसहित निरन्तरता पाउँदै आएको छ।

लहान नगरक्षेत्रका वडा नं. १ देखि २४ सम्मका ६८ मुसहर बस्तीलाई समेट्ने गरी अघि बढाइएको अभियानको उद्देश्य बालबालिका विद्यालय समयमा स्कूलमै देखिनु पर्ने र समुदायमा शिक्षा, स्वास्थ्य तथा सरसफाइप्रति व्यवहारगत परिवर्तन ल्याउनु रहेको सञ्जालले जनाएको छ।

मुसहर युवा सञ्जालका युवा अगुवाहरूका अनुसार, गरिबी, सामाजिक उपेक्षा र अवसरहीनताबीच पुस्तौंदेखि पछाडि पारिएको समुदायलाई शिक्षामार्गबाट उठाउने लक्ष्यसहित अभियान सुरु गरिएको हो।
उनहरूका शब्दमा— “शिक्षा नै परिवर्तनको एक मात्र बाटो हो।”

अभियानले अभिभावकहरूलाई शिक्षाको आवश्यकता र फाइदाबारे सचेत गराइरहेको छ भने बालबालिकालाई विद्यालय आकर्षित गर्ने कार्यक्रम नियमित गरिने जनाएको छ।

पहिलो चरण जटियाही (वडा १२), दोस्रो चरण मेनहर्वा (वडा १५) र तेस्रो चरण बलानसैर (वडा १७) मा सम्पन्न गरिएको अभियानलाई अब हरेक शनिबार विभिन्न मुसहर बस्तीहरूमा निरन्तर सञ्चालन गर्ने तयारी गरिएको छ।

युवाहरूले शिक्षा प्राप्त भएपछि आर्थिक सशक्तीकरण, अधिकार अभिव्यक्तिको क्षमता र समुदायको पहिचान परिवर्तन सम्भव हुने धारणा राखे। अभिभावक तथा स्थानीयवासीले विद्यालय समयमा बालबालिका घर वा बाहिर नदेखिने प्रतिबद्धता पनि जनाएका छन्।

मुसहर समुदायकै युवाहरूले सञ्चालन गरेको यो पहल स्थानीय नेतृत्व, जागरण र सामाजिक रुपान्तरणको प्रभावकारी मोडेलका रूपमा अगाडि बढिरहेको छ।
अभियानले समुदायकै भित्रबाट दिगो परिवर्तन सम्भव हुने स्पष्ट संकेत दिएको छ।