महेश सिंह सिरहा -नेकपा (एमाले) क्षेत्र नम्बर १ अन्तर्गत केन्द्रीय, प्रदेश, जिल्ला तथा पालिका स्तरका पदाधिकारीहरू सहभागी रहेको बैठक आज पढडिया स्थित सिर्जना पुस्तकालयमा सम्पन्न भएको छ। संगठन सुदृढीकरणदेखि आगामी कार्यक्रमको तयारीसम्मका विषयमा केन्द्रित बैठकले केही समसामयिक निर्णयहरू पारित गरेको आयोजकले जनाएको छ।
बैठकमा जिल्ला अध्यक्ष अशोक यादव, जिल्ला कमिटी सदस्य उग्र नारायण यादवलगायतका अतिथिहरूको उपस्थिति थियो। उनीहरूले पार्टीको स्थानीय संरचना सक्रियता, संगठन विस्तार, आन्तरिक समन्वय र जनसंगठनहरूलाई जोडदार रूपमा परिचालन गर्ने विषयमा सुझाव प्रदान गरेका थिए।
बैठकले वडा, टोल तथा संगठनात्मक कमिटीहरूलाई प्रभावकारी बनाउन निर्देशन दिँदै आगामी राजनीतिक गतिविधि, सदस्यता नवीकरण, प्रशिक्षण तथा सार्वजनिक कार्यक्रमहरूलाई समन्वित रूपमा अघि बढाउने निर्णय गरेको छ।
सिरहा क्षेत्र नं. १ को आजको बैठकलाई एमालेको स्थानीय संरचनाभित्र संगठनात्मक एकता, प्रभावकारी क्रियाशीलता र योजनाबद्ध गतिविधि संचालनका लागि महत्वपूर्ण रूपमा लिइएको छ।
Discussion about this post