पार्टीविरुद्धको भ्रम र षड्यन्त्रको प्रतिवाद गर्न जनस्तरमा पुग्ने’ निष्कर्ष

महेश सिंह लहान – नेकपा (एमाले) लहान नगर कमिटीको सचिवालय र वडा कमिटी अध्यक्षहरूको संयुक्त बैठक आज सम्पन्न भएको छ। बैठकले संगठन सुदृढीकरण, जनस्तरमा पहुँच विस्तार र पार्टीविरुद्ध भइरहेका भ्रमपूर्ण प्रचारको खण्डन गर्ने उद्देश्यका साथ आगामी कार्यक्रम तय गरेको हो।

बैठकका निर्णयअनुसार कार्तिक २२ गते दिउँसो १२ बजे नगरका २४ वटै वडामा वडा भेला आयोजना गरिनेछ भने कार्तिक २५ गते दिउँसो १२ बजे सबै वडाबाट सहभागितासहित मोटरसाइकल र्‍याली निकालिनेछ।

बैठकमा सहभागी नेताहरूले हाल देशमा देखिएका असंवैधानिक गतिविधि, संसद पुनर्स्थापना र पार्टीविरुद्धको प्रचार–प्रसारका विषयमा संगठन र जनतालाई सचेत पार्दै पार्टीको नीतिगत धारणा स्पष्ट रूपमा प्रस्तुत गर्नुपर्ने निष्कर्ष निकाले।

बैठकपश्चात् अध्यक्षले भने,
“एमाले जनताको भरोसा जित्ने पार्टी हो। भ्रम, षड्यन्त्र र असंवैधानिक चलखेलको प्रतिवाद हामी जनस्तरमै पुगेर गर्नेछौं।”

बैठकले पार्टीको आन्तरिक संगठनात्मक तयारीलाई तीव्रता दिने, युवा र जनसंगठनहरूलाई सक्रिय रूपमा परिचालन गर्ने र आगामी राजनीतिक गतिविधि योजनाबद्ध रूपमा अघि बढाउने निर्णय गरेको छ।