महेश सिंह लहान – थारु कल्याणकारी समाज, शम्भुनाथ नगर कमिटीद्वारा आयोजित “समाचकेवा महोत्सव–२०८२” शनिबार सप्तरीको शम्भुनाथ नगरपालिका–४, सखुवा (बजरंगबलि हटिया) मा भव्य रूपमा सम्पन्न भएको छ।
महोत्सवको उद्घाटन तथा प्रमुख आतिथ्य मधेश प्रदेश सरकारका निवर्तमान भौतिक पूर्वाधार विकास मन्त्री तथा संसदीय दलका नेता माननीय सरोज कुमार यादवले गर्नुभएको थियो।
समारोहलाई सम्बोधन गर्दै यादवले थारु समुदाय नेपालको मौलिक पहिचान र सांस्कृतिक धरोहर भएको बताउँदै, परम्परागत संस्कृति र भाषाको संरक्षणका लागि राज्यले आवश्यक नीति तथा कार्यक्रममार्फत सहयोग गर्नुपर्ने धारणा व्यक्त गरे। उनले सामुदायिक एकता र सामाजिक सद्भावलाई बलियो बनाउने माध्यमका रूपमा यस्ता सांस्कृतिक पर्वहरूको महत्व औंल्याए।
कार्यक्रममा स्थानीय जनप्रतिनिधि, बौद्धिक वर्ग, समाजसेवी तथा युवाहरूको उल्लेखनीय सहभागिता रहेको थियो। विभिन्न सांस्कृतिक प्रस्तुति, पारम्परिक नृत्य र लोकगीतहरूले वातावरण उत्सवमय बनेको थियो।
महोत्सवको अन्त्यमा आयोजक समितिले सहभागीहरूलाई धन्यवाद ज्ञापन गर्दै आगामी वर्ष अझै भव्य रूपमा आयोजना गर्ने घोषणा गरेको छ।
Discussion about this post