जनमत पार्टीको आगामी निर्वाचन केन्द्रित संगठन सुदृढीकरणमा जोड

महेश सिंह सिरहा लहान – जनमत पार्टी सिरहा क्षेत्र नं. १ अन्तर्गत लहान नगरपालिका पार्टी कार्यलयमा आज मतदाता सम्बन्धी छलफल कार्यक्रम भव्यताका साथ सम्पन्न भएको छ। कार्यक्रममा पार्टीका वरिष्ठ नेता बालेश्वर यादव र जिल्ला अध्यक्ष विनोद कुमार यादवको विशेष उपस्थितिमा मतदाता सचेतना, निर्वाचन तयारी र संगठन सुदृढीकरणका विषयमा विस्तृत छलफल गरिएको थियो।

नेता बालेश्वर यादवले जनताको अभिमत र मताधिकारलाई सम्मान गर्ने लोकतान्त्रिक संस्कृति विकासका लागि जनमत पार्टी प्रतिबद्ध रहेको बताए। उनले कार्यकर्ताहरूलाई मतदातासँग प्रत्यक्ष संवाद गरी पार्टीको नीति, कार्यक्रम र आगामी योजनाबारे जनतालाई जानकारी गराउन आग्रह गरे।

त्यस्तै, जिल्ला अध्यक्ष विनोद कुमार यादवले संगठनलाई तल्लो तहसम्म विस्तार गर्दै युवालाई जिम्मेवारीपूर्ण भूमिकामा ल्याउने योजना प्रस्तुत गरे। उनले आगामी निर्वाचनका तयारीहरू व्यवस्थित ढंगले अघि बढाउने कुरा पनि स्पष्ट पारे।

कार्यक्रममा विभिन्न वडा प्रतिनिधि, महिला, युवा तथा स्थानीय अगुवाहरूको सक्रिय सहभागिता रहेको थियो। अन्त्यमा सहभागीहरूले मतदाता अभिलेख अद्यावधिक, जनसम्पर्क सुदृढीकरण र स्थानीयस्तरमा पार्टीको सशक्त उपस्थितिका लागि सामूहिक प्रतिबद्धता जनाए।