महेश सिंह सिरहा – सप्तरीको सुरुङ्गा नगरपालिका–९ प्रमाणपुरका स्थानीय शिक्षक श्रावण राममाथि वैदेशिक रोजगारका नाममा गाउँका सोझासिधा नागरिकहरूलाई ठगी गरेको आरोप लागेको छ। जनताको विश्वास जितेर बिदेश पठाउने प्रलोभनमा पारी लाखौँ रुपैयाँ असुली गरिएको पीडितहरूले बताएका छन्।
प्रमाणपुरका राधेश्याम चौधरीले आफ्ना कान्छा छोरा पशुपति चौधरीलाई बिदेश पठाउने क्रममा शिक्षक श्रावण रामलाई रु. २ लाख २५ हजार ६ सय २५ रुपैयाँ बुझाएका थिए। “दुबै पठाइदिन्छु” भन्दै रकम लिएर उनले विदेश पठाए पनि छोरा पशुपति हाल दुबईमा अलपत्र परेका छन्, कुनै काम नपाई तीन महिनादेखि तलबसमेत पाएका छैनन्,” श्रीमती रिता चौधरीले बताइन्।
रिताका श्रीमान् गजेन्द्र चौधरीलाई समेत श्रावण रामले “क्लिनर मार्केट” अर्थात सरसफाइको काम दिने भन्दै बिदेश पठाएका थिए। तर प्रतिवद्धता अनुसारको काम नपाई अलपत्र अवस्थामा रहेका गजेन्द्रको पनि तलब रोकिएको परिवारले जनाएको छ।
त्यस्तै, रामजिवन चौधरीका छोरा सुनिल चौधरीले पनि दुबई पठाउने भन्दै श्रावण रामलाई रु. १ लाख १७ हजार बुझाएका थिए। बिचौलियाको रूपमा काम गर्दै आएका उनले राहदानी संकलन गरी गाउँकै नागरिकहरूलाई वैदेशिक रोजगारका नाममा ठगी गरेको पीडितहरूको आरोप छ।
पीडित पक्षका अनुसार, सुरुङ्गा–४ का देवेंद्र चौधरीको रोहबरमा श्रावण रामले १५ दिनभित्र काम उपलब्ध गराउने र सम्झौता अनुसारको तलब दिने वाचा गरेका थिए। तर वाचा विपरीत कुनै व्यवस्था नगरी सर्वसाधारणको रकम ठगी गरिएको हो।
स्थानीयवासीहरूका अनुसार, सरकारी विद्यालयका शिक्षकको हैसियतमा रहेर श्रावण रामले एजेन्टहरूसँग मिलेमतो गरी गाउँका युवाहरूबाट रकम असुलेका छन्। “शिक्षकजस्तो जिम्मेवार पेशामा रहेर यस्ता कार्य गर्नु निन्दनीय छ, उनले सम्पूर्ण शिक्षक समुदायको बदनाम गरेका छन्,” स्थानीयले बताएका छन्।
ञ
पीडितहरूले शिक्षा शाखा प्रमुख र जिल्ला शिक्षा समन्वयय इकाइलाई तत्काल कारबाहीको माग गरेका छन्। उनीहरूले भनेका छन् — “हामीले दिएको रकम ब्याजसहित फिर्ता गरियोस् र अलपत्र परेका युवाहरूलाई सुरक्षित रूपमा नेपाल फर्काइयोस्।”
Discussion about this post