महेश सिंह लहान सिराहा,— “The Girl I Am, The Change I Lead” भन्ने नाराका साथ सिरहाको गोलबजारमा अन्तर्राष्ट्रिय बालिका दिवस–२०८२ को अवसरमा विभिन्न सांस्कृतिक कार्यक्रम सम्पन्न भएका छन्।
मुक्ति नेपाल, गोलबजारद्वारा आयोजित कार्यक्रममा बालिकाहरूबीच कविता, गीत र नृत्य प्रतियोगिता आयोजना गरिएको थियो। कार्यक्रममा स्थानीय विद्यालयका विद्यार्थी, शिक्षक, अभिभावक तथा समुदायका प्रतिनिधिहरूको उत्साहजनक सहभागिता रहेको थियो।
बालबालिका सशक्तीकरण कार्यक्रम संयोजक बिशेश्वर कुमार दासका अनुसार, मुक्ति नेपालले बालिकाहरूलाई हौसला प्रदान गर्न, उनीहरूको आत्मविश्वास वृद्धि गर्न र नेतृत्व क्षमताको विकासका लागि प्रत्येक वर्ष अन्तर्राष्ट्रिय बालिका दिवसका अवसरमा यस्ता कार्यक्रमहरू आयोजना गर्दै आएको छ। शनिबार सम्पन्न कार्यक्रममा दिरेन्द्र साहसहितका व्यक्तिहरूले निर्णायकको भूमिका निर्वाह गरेका थिए। कार्यक्रममा गोलबजार नगरपालिका अन्तर्गतका विभिन्न विद्यालयका बालक्लबका बालिकाहरूको उल्लेखनीय उपस्थिति रहेको थियो।
यस वर्ष मुक्ति नेपालले “नेतृत्व गीत–कविता प्रतियोगिता” आयोजना गरी दिवस मनाएको हो। प्रतियोगितामा प्रथम, द्वितीय र तृतीय स्थान हासिल गर्ने गरी जम्मा २४ जना विद्यार्थीलाई शैक्षिक सामग्री वितरण गरिएको मुक्ति नेपालले जनाएको छ। कार्यक्रम अतिथि सदन, गोलबजारमा सम्पन्न भएको हो। मुक्ति नेपालले बालबालिकाको सशक्तीकरण, शिक्षा र नेतृत्व विकासका अभियानलाई आगामी वर्षहरूमा पनि निरन्तरता दिने प्रतिबद्धता जनाएको छ।
Discussion about this post