महेश सिंह सिरहा-सिरहाको धनगढीमाई नगरपालिकामा जलवायु मैत्री गाउँ नेपाल परियोजनाअन्तर्गत अगुवाई किसान तथा स्थानीय सरकारका सरोकारवालासँग अन्तरक्रिया कार्यक्रम सम्पन्न भएको छ।
राष्ट्रिय कृषक समूह महासंघ नेपाल, मधेस प्रदेश सिरहाको आयोजनामा तथा केयर नेपालको आर्थिक सहयोगमा कार्यक्रम सम्पन्न गरिएको हो।
कार्यक्रममा परियोजनाका प्राविधिक ईश्वर थापाले परियोजनाको उद्देश्य, लक्ष्य र उपलब्धीबारे जानकारी गराउँदै जलवायु परिवर्तनका प्रभाव न्यूनीकरण र अनुकूलनका लागि स्थानीय स्तरको सहकार्य अपरिहार्य रहेको बताए।
धनगढीमाईसहित मधेस प्रदेशका विभिन्न क्षेत्रहरूमा हरित गृह ग्यास उत्सर्जन न्यूनिकरण गर्दै लिङ्ग समानता र जलवायु उत्थानशील कृषि समुदायको विकास गर्नु परियोजनाको मुख्य लक्ष्य रहेको छ।
परियोजनाले साना, भूमिहीन, महिला, युवा तथा सीमान्तकृत किसानलाई जलवायु परिवर्तनअनुकूल कृषि अभ्यासमा अभ्यस्त गराउने, साथै स्थानीय तहका नीति, योजना र बजेटमा जलवायु न्यायसम्बन्धी कार्यक्रमको सुनिश्चितता गराउने उद्देश्य लिएको छ।
अन्तरक्रियामा सहभागी किसान तथा सरोकारवालाहरूले जलवायुमैत्री कृषि अभ्यासलाई स्थानीय नीतिमा समावेश गर्न निरन्तर प्रयास गर्ने प्रतिबद्धता व्यक्त गरेका छन्।
Discussion about this post