सीसीटीभी र चप्पलको सुराकीले फोडियो सिरहाको वृद्ध हत्या प्रकरण

महेश सिंह सिरहा लहान – साउन १४ गते सिरहाको धनगढीमाई नगरपालिका–११ आमटोलमा भएको ८८ वर्षीय फनिलाल यादवको हत्या प्रकरण प्रहरीले सीसीटीभी फुटेज र घटनास्थलमा छुटेको चप्पलको सुराकीका आधारमा फोडेको छ।
प्रहरीले यस घटनामा संलग्न रहेको आरोपमा धनगढीमाई–२ भवानीपुरका ३३ वर्षीय महेश चौधरी र १९ वर्षीय प्रशान्त मण्डललाई पक्राउ गरेको हो। प्रारम्भिक अनुसन्धानमा दुवै जना चोरी गर्ने उद्देश्यले वृद्धको घरमा पसेको र हल्ला मच्चिएपछि हत्या गरेको खुलेको जिल्ला प्रहरी प्रमुख एसपी अनन्तराम शर्माले बताए।
घटनामा प्रयोग गरिएको खुकुरी चौधरीसँगै फेला परेको प्रहरीले जनाएको छ।
प्रशान्त मण्डल साउन २३ गते पक्राउ परेका थिए भने उनको बयानका आधारमा महेश चौधरी साउन २७ गते पक्राउ परेका हुन्।
यो घटनाको अनुसन्धान इलाका प्रहरी कार्यालय लहान, जिल्ला प्रहरी कार्यालय, मधेस प्रदेश प्रहरी र केन्द्रीय अनुसन्धान ब्युरो (CIB) को संयुक्त टोलीले गरिरहेको छ।
फनिलाल यादवको हत्या गाउँमा ठूलो सुरक्षा चासोको विषय बनेको छ। स्थानीय बासिन्दाले वृद्ध, महिला र एक्लै बस्ने घरहरूमा थप सतर्कता अपनाउन आग्रह गरेका छन्। जिल्ला अदालतले दुवै आरोपितलाई कर्तव्य ज्यान मुद्दामा ७ दिनको म्याद थप गरी अनुसन्धान अघि बढाइरहेको प्रहरीले जनाएको छ।