सिरहामा विश्व हिन्दू परिषद्को योजना बैठक सम्पन्न

महेश सिंह लहान सिरहा- विश्व हिन्दू परिषद नेपाल, सिरहा जिल्ला कार्यसमितिको आयोजनामा एकदिने योजना बैठक तथा प्रशिक्षण कार्यक्रम सम्पन्न भएको छ। सिरहा नगरपालिका–१ स्थित पुस्तकालय भवनमा भएको कार्यक्रममा सनातनी धार्मिक व्यक्तित्वदेखि परिषद्का संरचनागत पदाधिकारीहरूको उल्लेख्य सहभागिता रहेको थियो।
जिल्ला अध्यक्ष शिवदेव साहको अध्यक्षतामा सम्पन्न कार्यक्रममा प्रमुख अतिथि श्री श्री १०८ हितराम दास बाबा र महन्थ लक्ष्मण दास वैष्णव बाबाले संगठनलाई अझ सुदृढ बनाउन आध्यात्मिक नेतृत्वको भूमिका महत्वपूर्ण हुनेमा जोड दिनुभयो।
बैठकमा राष्ट्रिय महासचिव जितेन्द्र सिंह, प्रदेश महिला प्रमुख सोनिता ठाकुर, सचिव जंगबहादुर सिंह, सिरहा अध्यक्ष कुशेश्वर यादव, सियाशरण सिंहलगायत सम्पूर्ण स्थानीय तहका अध्यक्ष, उपाध्यक्ष, सचिव, सम्पर्क प्रमुख, युवा प्रमुख, महिला प्रमुख, सत्संग प्रमुख, धार्मिक पुञ्ज प्रमुख, गौ रक्षा प्रमुख, सेवा प्रमुख र सञ्चार प्रमुखहरूको उपस्थिति थियो।
कार्यक्रममा संगठन विस्तार, धार्मिक तथा सामाजिक अभियानलाई प्रभावकारी बनाउने तरिका र आगामी कार्ययोजना सम्बन्धी प्रशिक्षण प्रदान गरिएको परिषद्ले जनाएको छ।