मधेसमै धेरै परीक्षा चोरी, सिरहामा मात्र ४३ प्रतिशत पास

साक्षर जिल्ला बनाउन शैक्षिक अभियान आवश्यक : शिक्षा ईकाई प्रमुख कोलोनी

महेश सिंह, सिरहा –देशभर शिक्षा क्षेत्रमा औसत ११ प्रतिशत बजेट लगानी भइरहे पनि त्यसको प्रभाव विद्यालयको शैक्षिक उपलब्धिमा अझै प्रष्ट देखिएको छैन। यसै सन्दर्भमा सार्वजनिक भएको एसईई नतिजामा मधेस प्रदेशको प्रदर्शन फेरि कमजोर देखिएको छ। सिरहा जिल्लाबाट मात्र ४३ प्रतिशत विद्यार्थी पास भएका छन्।

शिक्षा ईकाई सिरहाका प्रमुख दीपक राज कोलोनीले शिक्षामा गुणस्तरीय सुधारको खाँचो औंल्याउँदै भने, “देशभर परिक्षामा सबैभन्दा बढी चोरी हुने प्रदेश मधेस हो भन्ने टिप्पणी दुर्भाग्यपूर्ण हो, यसले शिक्षा प्रणालीमाथि प्रश्न उठाउँछ।” उनले कमजोर नतिजा ल्याउने विद्यार्थीहरूलाई निरुत्साहित नहुन आग्रह गर्दै, “पढाइ हुँदै जान्छ, आत्मबल र हौसलाको संस्कृति विकास गर्नु अहिलेको आवश्यकता हो,” भने।

कोलोनीले शिक्षा क्षेत्रमा शिक्षक मिलानको समस्या पनि गम्भीर रहेको उल्लेख गर्दै, साक्षर जिल्ला घोषणा गर्न गाउँ–गाउँमा शैक्षिक अभियान सञ्चालन गर्नुपर्ने आवश्यकता औंल्याए। उनले भने, “शिक्षा विकासमा सबैको सामूहिक प्रयास जरुरी छ।”
एसईई परिक्षामा जिल्लाभर उत्कृष्ट अङ्क ल्याएर प्रथम हुने विद्यार्थी रोहित कुमार यादवलाई सम्मान गरिएको थियो। उनका पिता जामुन प्रसाद यादवले रोहित सानैदेखि पढाइमा अब्बल रहेको बताए।
कार्यक्रमको अध्यक्षता शिव यादवले गरेका थिए। कार्यक्रममा विभिन्न विषयमा राम्रो अङ्क ल्याएर उतीर्ण भएका विद्यार्थीहरूलाई स्कोलरसिप प्रदान गरिएको थियो। साथै, सफल विद्यार्थीहरूलाई बधाई दिँदै उज्वल भविष्यको शुभकामना व्यक्त गरिएको थियो।