प्रादेशिक अस्पताल लहानमा काठमाडौं–विराटनगर रेफर न्यून,दैनिक ५०० बिरामीको उपचार हुँदै

महेश सिंह सिंह-  लहान–३ स्थित प्रादेशिक अस्पतालले पछिल्ला दिनमा सेवा गुणस्तरमा सुधार ल्याउँदै सिरहा, सप्तरी र उदयपुर जिल्लाका बासिन्दाको आशाको केन्द्रका रूपमा परिचय बनाएको छ।
विभिन्न रोगका विशेषज्ञ चिकित्सकहरूको उपलब्धता, सहज सेवा प्रवाह र नागरिकमैत्री व्यवस्थापनका कारण सेवा लिन आएका बिरामीहरू राजधानी काठमाडौँ वा विराटनगरसम्म जानुपर्ने बाध्यताबाट मुक्त भएका छन्।
स्थानीय वडा अध्यक्ष रामदियाल महतोका अनुसार, अस्पतालको सेवा स्तरमा उल्लेखनीय सुधार आएपछि सर्वसाधारणमा उत्साह र सन्तुष्टि बढेको छ। उनका अनुसार, “अब धेरैजसो सेवा यहीँ उपलब्ध भएपछि रेफरको झन्झट हटेको छ।”
सेवा गुणस्तरको प्रभावस्वरूप अहिले अस्पतालमा दैनिक औसत पाँच सय बिरामीले विभिन्न सेवा लिने गरेका छन्। ओपीडी, आकस्मिक सेवा, ल्याब, एक्स–रे, भिडियो एक्स–रे, प्रसूति तथा अप्रेसन सेवा, हाडजोर्नी, बालरोग, सर्जरी, दन्त, हेमोडायलाइसिस लगायतका सेवा नियमित रूपमा सञ्चालनमा छन्।
त्यस्तै, १५ वर्ष मुनिका थाईलेसेमिया पीडित बालबालिकालाई पूर्ण रूपमा निःशुल्क सेवा, इसिजी र रेबीज खोप सेवासमेत प्रवाह भइरहेका छन्।
गरिब, दलित र सीमान्तकृत समुदायका लागि सामाजिक सुरक्षा एकाइमार्फत निःशुल्क उपचार सेवा दिइँदै आएको छ। अस्पतालका कर्मचारी रामलाल महतोका अनुसार, “आर्थिक रूपले कमजोर समुदायको पहुँचका लागि यो अस्पताल एक मात्र विकल्प बनिरहेको छ।”
अस्पताल प्रमुख तथा मेडिकल सुपरीटेन्डेन्ट डा. रञ्जित कुमार झा स्वयं सेवा प्रवाहमा अग्रसर रहँदै बिरामीहरूको उपचारमा खटिने गरेका छन्।
बढ्दो बिरामीको चापका कारण अस्पतालमा श्रोतसाधन र जनशक्तिको अभाव महसुस भइरहेको अस्पताल स्रोतले जनाएको छ। सिटी स्क्यान सेवा अझ प्रभावकारी बनाउन आवश्यक रहेको र यसतर्फ ध्यान दिइएको अस्पताल प्रशासनको भनाइ छ।
प्रादेशिक अस्पतालको गुणस्तरीय सेवाले लहानसहित आसपासका निजी अस्पतालहरूमा बिरामीको चाप कम भएको छ। सरकारी सेवाप्रति आमनागरिकको भरोसा बढ्दै गएको देखिन्छ।