सिरहामा ट्राफिक जनचेतनामूलक सप्ताह सुरु सडक सुरक्षाबारे जनचेतना फैलाउन एक हप्तासम्म विविध कार्यक्रम सञ्चालन हुने

महेश सिंह लहान,- सडक दुर्घटना न्यूनीकरण र ट्राफिक नियमबारे जनचेतना अभिवृद्धि गर्ने उद्देश्यले जिल्ला ट्राफिक प्रहरी कार्यालय सिरहाले ट्राफिक जनचेतनामूलक सप्ताह सुरु गरेको छ। लहानमा मंगलबारदेखि सुरु भएको कार्यक्रम एक सातासम्म सञ्चालन हुने छ।
सप्ताहको उद्घाटन जिल्ला प्रहरी कार्यालय सिरहाका प्रमुख एसपी अन्नतराम शर्माको अध्यक्षतामा भएको हो। कार्यक्रममा लहान नगरपालिकाका मेयर महेश चौधरी प्रमुख अतिथि थिए। प्रमुख जिल्ला अधिकारी विश्वप्रकाश अर्याल, सशस्त्र प्रहरी बल सिरहाका एसपी नरेश भण्डारी, जिल्ला उद्योग वाणिज्य संघ लहानका अध्यक्ष विकास शारदा, पत्रकार महासंघ सिरहाका अध्यक्ष मनोज बनैता, विभिन्न विद्यालयका प्राचार्य, संघसंस्थाका प्रतिनिधि र सर्वसाधारणको उपस्थिति रहेको थियो।
कार्यक्रमको सुरुमा विभिन्न विद्यालयका विद्यार्थी सहभागी गराई प्रभातफेरी निकालिएको थियो। ‘सुरक्षित यात्रा, जिम्मेवार नागरिक’ भन्ने नारासहित सुरु गरिएको कार्यक्रममा सडक सुरक्षासम्बन्धी विविध गतिविधि सञ्चालन हुने जिल्ला ट्राफिक प्रहरी प्रमुख पोषण थपलियाले जानकारी दिए।
सप्ताहभर सवारी चेकजाँच, स्टीकर टाँस्ने, माइकिङ, विद्यालयमा सचेतनामूलक सत्रलगायतका कार्यक्रम सञ्चालन गरिनेछ। प्रहरीका अनुसार पछिल्लो समय जिल्लामा बढ्दो दुर्घटनालाई मध्यनजर गर्दै यस वर्षको जनचेतनामूलक सप्ताह विशेष रूपमा आयोजना गरिएको हो। कार्यक्रमले सडक प्रयोगकर्तामा ट्राफिक नियमको पालना गर्न प्रेरित गर्ने अपेक्षा लिएको प्रहरीले जनाएको छ।