लहानमा विश्व वातावरण दिवसका अवसरमा वृक्षरोपण

महेश सिंह सिरहा- विश्व वातावरण दिवसको अवसरमा सिरहाको लहान नगरपालिका–७ मा अवस्थित जे.एस. मुरारका बहुमुखी क्याम्पसको प्राङ्गणमा वृक्षरोपण कार्यक्रम सम्पन्न गरिएको छ।
‘वन जंगलको संरक्षण गरौं, रुख रोपौं, जीवन जोगाऔं’ भन्ने मुल नाराका साथ आयोजित कार्यक्रममा ग्लोब आईएमई बैंक, लहान शाखाले क्याम्पससँगको सहकार्यमा विभिन्न जातका बिरुवा रोपेका छन्। वातावरणीय सन्तुलन कायम राख्न र जनचेतना अभिवृद्धि गर्ने उद्देश्यले कार्यक्रमको आयोजना गरिएको हो।
कार्यक्रममा सहायक क्याम्पस प्रमुख सजन कुमार साह, बैंकका शाखा प्रतिनिधिहरू तथा क्याम्पसमा अध्ययनरत विद्यार्थीहरूको उल्लेखनीय उपस्थिति थियो। सहभागीहरूले क्याम्पस प्राङ्गणमा लिची, अमला, अशोक, सिसौ, कदम लगायतका फलफूल तथा छायादार र बहुपयोगी बिरुवा रोपे।
सहायक क्याम्पस प्रमुख साहले वातावरण संरक्षणमा युवाको सक्रियता आवश्यक रहेको उल्लेख गर्दै यस्तो अभियानले दीर्घकालीन प्रभाव पार्ने विश्वास व्यक्त गरे। उनले भने, “हामीले आज रोपेका रुख भविष्यका पुस्ताको लागि उपहार बन्नेछन्।”
कार्यक्रमका सहभागीहरूले वातावरणीय सचेतना अभिवृद्धिका लागि यस्ता अभियानलाई निरन्तरता दिनुपर्नेमा जोड दिएका थिए।