अन्तर्राष्ट्रिय महिनावारी सरसफाइ दिवस २०२५ लहानमा उत्साहपूर्वक सम्पन्न

महेश सिंह लहान,– “महिनावारीमैत्री संसारका लागि संगै अघि बढौं” भन्ने नाराका साथ अन्तर्राष्ट्रिय महिनावारी सरसफाइ दिवस २०२५ लहानमा विशेष कार्यक्रमका साथ सम्पन्न भएको छ।

लहान नगरपालिकाको आयोजना तथा विभिन्न राष्ट्रिय र अन्तर्राष्ट्रिय संघसंस्थाको सहकार्यमा सम्पन्न कार्यक्रम महिलाहरूको मासिक धर्म सम्बन्धी स्वच्छता, चेतना र समानतामूलक व्यवहारलाई प्रवर्द्धन गर्ने उद्देश्यले आयोजना गरिएको हो। कार्यक्रममा महिलाहरूले र्याली, गीत, नाच र जनचेतनामूलक सन्देशहरू प्रस्तुत गरेका थिए।

उक्त कार्यक्रममा सहभागीहरूले मासिक धर्मको सरसफाइ विषयमा खुल्ला रूपमा छलफल गर्दै, समाजमा व्याप्त मिथक र लाजको संस्कृतिलाई अन्त्य गर्नुपर्ने आवश्यकता औंल्याए।

कार्यक्रममा The Beacon Project, SOS Children’s Villages, One Heart Worldwide, HOPE Foundation Nepal, Marie Stopes International, Nepal Water Supply Corporation, र Anglian Water लगायतका संस्थाहरूको सक्रिय सहभागिता रहेको थियो।

कार्यक्रमले मासिक धर्म सरसफाइको महत्त्वमाथि जनचेतना फैलाउँदै आगामी दिनहरूमा महिनावारीलाई सामान्य जैविक प्रक्रियाको रूपमा स्वीकार गर्ने संस्कृतिको विकासतर्फ योगदान दिने विश्वास आयोजकहरूले व्यक्त गरेका छन्।