महेश सिंह सिरहा –जिल्ला प्रहरी कार्यालय सिरहाले अवैध लागूऔषध ब्राउन सुगर र स्रोत नखुलेको ठूलो मात्रामा नगदसहित पाँच जनालाई पक्राउ गरेको छ। पक्राउ परेकामध्ये एक जना महिला पनि छन्।
लहान नगरपालिका–२२ लबटोलीका ३२ वर्षीय दिनेशकुमार यादव र उनकी बहिनी २६ वर्षीया किरणकुमारी यादवको साथबाट ५५ लाख रुपैयाँ नगद र २ सय १ ग्राम ब्राउन सुगर बरामद गरिएको प्रहरीले जनाएको छ।
शुक्रबार साँझ चेकजाँचको क्रममा को ५ प ६९२७ नम्बरको पल्सर मोटरसाइकलमा सवार उनीहरूबाट प्रारम्भिक रूपमा २१ ग्राम ब्राउन सुगर, ५१ हजार रुपैयाँ नगद र दुई मोबाइल बरामद भएको थियो।
पछि उनीहरूको घर खानतलासी गर्दा थप १ सय ८० ग्राम ब्राउन सुगर, ५४ लाख १४ हजार रुपैयाँभन्दा बढी नेपाली रुपैयाँ र ३५ हजार ७ सय ८० भारतीय रुपैयाँ फेला परेको प्रहरीले जनाएको छ।
सिरहा प्रहरी प्रमुख एसपी अनन्तराम शर्माका अनुसार उनीहरूको साथबाट कुल ५५ लाख २२ हजार ९ सय ८३ रुपैयाँ, २ सय १ ग्राम ब्राउन सुगर, एक थान डिजिटल तराजु र ६ थान मोबाइल बरामद गरिएको हो।
यसैबीच, प्रहरीले सिरहा नगरपालिका–१७ का ४५ वर्षीय सञ्जय कारकलाई १६ लाख ३८ हजार ३ सय ७० रुपैयाँसहित शनिबार महावीर चोकबाट पक्राउ गरेको छ। रकमको स्रोत खुलाउन नसकेपछि उनलाई नियन्त्रणमा लिइएको प्रहरीको भनाइ छ।
त्यस्तै, औरही गाउँपालिका–३ का २० वर्षीय कृष्णकुमार यादव र १९ वर्षीय निरज रायलाई ७१० मिलिग्राम ब्राउन सुगरसहित शनिबार बरियारपट्टी गाउँपालिका–३ बाट पक्राउ गरिएको छ।
पक्राउ परेकाहरूलाई आइतबार पत्रकार सम्मेलनमार्फत सार्वजनिक गरिएको छ। प्रहरीले यो कारबाहीलाई लागूऔषध र अवैध कारोबारविरुद्धको अभियानको एक हिस्सा भनेको छ।
Discussion about this post