नेपाल थारु सङ्घको चेतावनी : तथ्यविना समाचार प्रकाशनले लोकतन्त्रमै प्रश्न
महेश सिंह लहान- लहान नगरपालिका–१ स्थित पशुपति आदर्श माविमा नौ वर्षअघिको पसल भाडा रकमसम्बन्धी विवादमा अदालतबाट फैसला आइसकेको अवस्थामा पुनः सञ्चारमाध्यममा व्यक्तिको नाम जोडेर समाचार प्रकाशन भएकोप्रति नेपाल थारु सङ्घले आपत्ति जनाएको छ।
नेपाल थारु सङ्घका अध्यक्ष अजय कुमार चौधरीले सोमबार प्रेस विज्ञप्ति जारी गर्दै अदालतको फैसलालाई उपेक्षा गर्दै नियोजित रुपमा ‘चरित्र हत्या’ गर्ने प्रयास भएको गम्भीर आरोप लगाएका हुन्। उनले फैसलापछि समेत पूर्वमन्त्रीसमेत रहेका विद्यालय दाता परिवारमाथि सार्वजनिक रूपमा बदनाम गराउने उद्देश्यले समाचार सम्प्रेषण गरिएको दाबी गरेका छन्।
“अदालतले उजुरीको आधारमा मुद्दा हेरी फैसला गरिसकेको छ,” विज्ञप्तिमा भनिएको छ, “तर अझै पनि केही सञ्चारमाध्यमले व्यक्तिगत आस्था र प्रतिष्ठामाथि आघात पुग्ने गरी समाचार सम्प्रेषण गरिरहेका छन्।”
विद्यालयले लहान नगरपालिकामा पेश गरेको दस्तावेजअनुसार सो मुद्दा जिल्ला अदालत सिरहामा विचाराधीन रही वैशाख १५ गते वादीको दावी नपुगेको ठहरसहित खारेज भइसकेको छ। त्यसपछि पनि पुनः सञ्चारमाध्यममा उठाइएको विषयले कानुनी प्रक्रिया र पत्रकारिता आचरणमाथि प्रश्न उठाएको थारु सङ्घको ठहर छ।
चौधरीले भने, “संविधानमा प्रेस स्वतन्त्रता ग्यारेन्टी गरिए पनि त्यो जिम्मेवारीबिनाको स्वतन्त्रता हुन सक्दैन। अदालतको फैसलापछि पुनः यस्ता समाचार आउनु प्रेस आचारसंहिताविपरीत हो।”
उनले यस्ता घटनाले संवैधानिक निकाय, सञ्चार क्षेत्र र नागरिक अधिकारप्रतिको भरोसामै आँच पुग्ने बताए। थारु सङ्घले यस्ता समाचार कसरी सार्वजनिक भए, कसले सूचनाको चुहावट गर्यो भन्नेबारे गम्भीर छानबिन हुनुपर्नेमा जोड दिएको छ।
“यदि नगरपालिका वा अन्य सरकारी संयन्त्रबाट जानकारी चुहिएको हो भने, त्यो आफैमा आपराधिक नियत हो,” विज्ञप्तिमा भनिएको छ, “दोषी जो–कोही होस्, कानुनी कठघरामा ल्याइनुपर्छ।”
चौधरीले निष्पक्ष र तथ्यमा आधारित पत्रकारिता गर्न आग्रह गर्दै सञ्चारमाध्यमलाई ‘प्रचार’ र ‘विचार’ बीचको सन्तुलन कायम राख्न चेतावनी दिएका छन्।
नेपाल थारु सङ्घको विज्ञप्तिसँगै सो विवादमा पुनः बहस चर्किने सम्भावना देखिएको छ। स्थानीय तह, सञ्चारकर्मी र सरोकारवाला निकायबीच पारदर्शिता र जवाफदेहिताको सवालमा नयाँ बहस शुरु भएको छ।
Discussion about this post