महेश सिंह सिरहा- पत्रकारको परिचय बोकेर सरकारी तथा निजी कार्यालयमा धम्क्याउने र चन्दा असुलीमा सक्रिय व्यक्तिहरूको बिगबिगी बढेपछि नेपाल पत्रकार महासंघ, सिरहाले कारबाही प्रक्रिया अघि बढाउने चेतावनी दिएको छ।
महासंघले आइतवार एक सूचना जारी गर्दै पत्रकारिताको आडमा हुने गैरपेशागत र अनैतिक गतिविधिले मिडियाको छविमा गम्भीर धक्का पुर्याएको जनाएको छ। सूचनामा भनिएको छ, “कतिपय व्यक्ति पत्रकार नाममा कार्यालय, होटल, व्यापारिक संस्था तथा प्रहरी इकाइमा पुगेर पैसा माग्ने, बार्गेनिङ गर्ने र धम्की दिने गतिविधिमा संलग्न छन्।”
गैरपेशागत प्रवृत्तिले पत्रकारिता व्यवसायप्रति आम जनमानसको विश्वास कमजोर बनाएको महासंघको ठहर छ। महासंघले यस्ता गतिविधिमा संलग्न देखिएमा नजिकको प्रहरी कार्यालय वा महासंघमा जानकारी गराउन सबैलाई आग्रहसमेत गरेको छ।
सिरहा जिल्लामा पत्रकारको नाममा सञ्चालित यस्ता क्रियाकलापबारे केही कार्यालय र स्थानीय निकायले समेत गुनासो जनाएका छन्। “मिडिया भन्ने वित्तिकै डराउनुपर्ने अवस्था आउन थालेको छ,” सिरहाका एक स्थानीय निकाय प्रमुखले नाम नखुलाउने सर्तमा भने, “कसले प्रेस पास देखाएर के माग्छ भन्ने टुंगो छैन।”
महासंघले यस्ता प्रवृत्तिलाई नियन्त्रण गर्न आवश्यक प्रमाणका आधारमा अनुशासन कारबाही अघि बढाउने जनाएको छ। यसअघि पनि यदाकदा यस्ता आरोप लाग्ने गरे पनि पछिल्लो समय यस्तो गतिविधि बढ्दै गएको पाइएको महासंघको भनाइ छ।
Discussion about this post