लहान-१९ मा कांग्रेसको प्रभाव बढ्दै, सयौं नेता कार्यकर्ता पार्टी प्रवेश

महेश सिंह लहान- नेपाली कांग्रेसले सिरहा जिल्लाको लहान नगरपालिका–१९ मा आफ्नो प्रभाव विस्तार गरेको छ। पार्टीको प्रयास र स्थानीय नेताहरुको सक्रियताले शिक्षा, स्वास्थ्य तथा पूर्वाधार विकासमा उल्लेखनीय फड्को मारेको वडाध्यक्ष कमरुदिन राईनले बताएका छन्। उनका अनुसार यो उपलब्धि कांग्रेसको जितको प्रतीक हो।
लहान नगर सभापति संजय कुमार यादवले पार्टी प्रवेश कार्यक्रममा बोल्दै लोकतन्त्र सुदृढ गर्न टुक्रा–टुक्रा भएका राजनीतिक दलहरुलाई एकताबद्ध गर्ने अभियान कांग्रेसले अघि सारेको बताए। “देश विकासको बाटोमा अगाडि बढाउन कांग्रेसको नेतृत्व अपरिहार्य छ। अब राजा होइन, कांग्रेस सलबलिन्छ,” उनले भने।
कार्यक्रममा जिल्ला सभापति रामचन्द्र यादव, पूर्वमन्त्री पदम नारायण चौधरी, क्षेत्र नं. १ का सभापति महेश प्रसाद चौधरी, नगर सभापति संजय यादव, नेता कमरुदिन राईन, क्षेत्रीय सचिव मुकेश कुमार महतो लगायत नेताहरुको उपस्थिति रहेको थियो।
पार्टी प्रवेश कार्यक्रममा नेपाल समाजवादी पार्टी (जसपा) र नेकपा एमाले परित्याग गरेका सयौं नेता कार्यकर्ताले कांग्रेस प्रवेश गरेको जिल्ला सभापति यादवले जानकारी दिए। “पार्टीको विरोध गर्ने मानिस कहिल्यै नेता बन्न सक्दैन,” उनले टिप्पणी गरे।
क्षेत्रीय सभापति महेश चौधरीले लहानमा विकासको लहर आएको दाबी गर्दै शिक्षा र स्वास्थ्य क्षेत्रमा पर्याप्त बजेट विनियोजन गरिएको बताए। प्रमुख अतिथि पूर्वमन्त्री चौधरीले हजरीया वडालाई पुनः कांग्रेसको ‘लालकिल्ला’ बनाएको घोषणा गरे।उनका अनुसार कांग्रेस पुनः हजरीया वडामा बलियो रुपमा स्थापित भएको छ।