सिरहाको सखुवानान्कारकट्टीमा भर्ना अभियान सुरु

महेश सिंह सिरहा- सिरहाको सखुवानान्कारकट्टी गाउँपालिका–२ सोठियाईनमा रहेको एक आधारभूत विद्यालयले वैशाख २० देखि ३० गतेसम्म भर्ना अभियान सञ्चालन गरेको छ। गरिब, दलित, अतिविपन्न र सीमान्तकृत समुदायका बालबालिकालाई शिक्षामा पहुँच दिलाउने उद्देश्यले अभियान सञ्चालन गरिएको विद्यालयका प्रधानाध्यापक चन्द्र मोहन यादवले बताए।
‘विद्यालय राम्रो शैक्षिक वातावरणयुक्त छ,’ प्रधानाध्यापक यादवले भने, ‘यहाँ अध्ययनरत अधिकांश विद्यार्थी दलित र डोम समुदायका छन्।’ उनका अनुसार हाल विद्यालयमा करिब ३०० बालबालिका अध्ययनरत छन्।
विद्यालयमा गुणस्तरीय शिक्षा प्रदान भइरहेको दाबी गर्दै यादवले भर्ना अभियान सफल बनाउन घरदैलो अभियानसमेत सञ्चालन गरिएको जानकारी दिए। ‘विद्यालयलाई अझ सुधार गर्दै नमुना बनाउने दिशामा स्थानीय सरकारको ध्यानाकर्षण आवश्यक छ,’ उनले भने।
विद्यालयको शैक्षिक सुधारसँगै भौतिक संरचनाको विकास पनि अपरिहार्य भएको उनी बताउँछन्। ‘यहाँबाट जेहेन्दार विद्यार्थी उत्पादन भइरहेको छ,’ यादवले थपे।
विद्यालय शान्त र मनोरम वातावरणमा अवस्थित छ। भर्ना अभियानका क्रममा अभिभावकलाई आफ्ना बालबालिकालाई विद्यालय पठाउन प्रोत्साहित गरिने विद्यालय प्रशासनले जनाएको छ।