लहानमा २४ कुण्डीय गायत्री महायज्ञ हुँदै

महेश सिंह लहान- सामाजिक रूपान्तरण र नैतिक जागरणको उद्देश्यसहित लहानमा २४ कुण्डीय गायत्री महायज्ञ आयोजना गरिने भएको छ। सप्तरी जिल्लाको लहान नगरपालिका–७ स्थित श्री पुरणजी रायसहित स्थानीय युवाहरूको अगुवाइमा ‘जग सेवा समिति’को आयोजनामा वैशाख ३ देखि ७ गतेसम्म धार्मिक महोत्सव सञ्चालन गरिने जनाइएको शिव देव साहले जानकारी दिनु भयो।
शान्तिकुञ्ज, हरिद्वारको मार्गदर्शनमा हुने उक्त कार्यक्रममा गायत्री महायज्ञसँगै प्रज्ञापुराण कथा वाचन, संस्कार महोत्सव, योग प्रशिक्षण शिविर, सांस्कृतिक प्रस्तुति तथा विविध सामाजिक कार्यक्रमहरू समावेश हुने आयोजकले जानकारी दिएको छ।

कार्यक्रमको पहिलो दिन वैशाख ३ गते बिहान ८ बजे कलश यात्रा तथा घष्ट्रारोहनपछि विधिवत् उद्घाटन हुने छ। त्यसपछि दैनिक बिहान र बेलुका दुई सत्रमा गायत्री यज्ञ कथा वाचन, योग अभ्यास तथा सामूहिक सन्देश प्रवाह गरिनेछ। कार्यक्रमको समापन वैशाख ७ गते पूर्णाहुति यज्ञ तथा विशाल भण्डारासहित गरिनेछ।
सामाजिक विसंगति, विकृति र कुसंस्कारविरुद्ध सकारात्मक चेतना फैलाउने उद्देश्यले यस्तो कार्यक्रम गरिएका हौं,” आयोजनाका प्रमुख संयोजक रायले बताए, “हाम्रा सनातन मूल्य, धर्म र संस्कृतिको संरक्षण र विस्तार अहिलेको आवश्यकता हो।”
गायत्री परिवार नेपालका अनुसार यस्ता कार्यक्रमले समाजमा धार्मिक, नैतिक र व्यवहारिक सुधार ल्याउने विश्वास लिइएको छ। आयोजकले कार्यक्रममा टोलवासी, अभिभावक, शिक्षित युवा वर्ग तथा सबै सरोकारवालालाई सहभागिता जनाउन आग्रहसमेत गरेका छन्।