जसपाको लहान नगर अधिबेशनमा पदको लागी हातपात , अधिबेशन बिवादमा

महेश सिंह लहान, सिरहा- जनता समाजवादी पार्टी (जसपा) नेपालले सिरहाको लहानमा आयोजना गरेको पहिलो नगर अधिवेशनले तीव्र आलोचना सामना गरिरहेको छ। शनिबार पदका लागी बिवाद चुलिदा एक अर्कामा हातपात समेत भएका छ।
मधेस आन्दोलनका सहिदहरूप्रति कुनै पनि श्रद्धाञ्जली कार्यक्रम नगरी अधिवेशन संचालन गरिएको आरोपले पार्टीप्रति गम्भीर असन्तुष्टि उत्पन्न भएको छ।
लहानलाई मधेस आन्दोलनको उद्गम स्थल मानिन्छ। यहीं २०६३ माघ ५ गते तत्कालीन मधेसी जनअधिकार फोरमका नेता उपेन्द्र यादवको नेतृत्वमा आन्दोलनको थालनी भएको थियो, जहाँ सहिद रमेश महतोले ज्यान गुमाएका थिए। सोही ऐतिहासिक सन्दर्भलाई बेवास्ता गर्दै जसपाले नगर अधिवेशनमा सहिदको सम्झना नगरेकोमा परिवारजनदेखि स्थानीय जनसमुदायसम्म आक्रोशित देखिएका छन्।

सहिद रमेश महतोका दाजु राम शोभित महतो भन्छन्, “हामीले भाइ गुमायौं, नेताहरूले पद पाए। तर सहिद परिवारहरू आज पनि उपेक्षित छन्। वर्षको एकपल्ट लाजले आउँछन्, त्यो पनि औपचारिकताका लागि मात्र।”

कार्यक्रममा जसपाका नेता राजकुमार गुप्ता ‘राजु’, दिनेश महतो, ललिता दास शत्रधन मण्डल, सुभक लाल यादव,राम उदगार महतो,लगायत सयौं नेता तथा कार्यकर्ताहरूको उपस्थिति रहेको थियो। तथापि, सहिदको नामसम्म नलिइएको भन्दै धेरैले आपत्ति जनाएका छन्। राजनीतिक विश्लेषकहरू भन्छन्, “मधेसी जनअधिकार फोरमबाट उदाएका जसपाले आफ्नै आन्दोलनका सहिदलाई बिर्सिनु दुर्भाग्यपूर्ण छ।”

कार्यक्रममा आन्तरिक विवाद पनि चुलिएको देखियो। लहान नगर अध्यक्ष पदका लागि नेताहरूबीच भनाभन, झगडा र हुलहुज्जतसमेत भएको बताइएको छ। निर्वाचन समितिको असमर्थताले गर्दा शनिबार हुने भनिएको अधिवेशन अब आइतबार निर्वाचन प्रक्रियामार्फत नगर प्रतिनिधि चयन गरी सम्पन्न गरिने भएको छ।

जसपाका अध्यक्ष उपेन्द्र यादवमाथि आरोप लागेको छ कि उनले मधेसको मसिहा भनिँदा पनि सहिदहरूको सम्मानमा निरन्तर उपेक्षा गर्दै आएका छन्। परिवारका सदस्यहरू तथा स्थानीय नागरिकहरूले यस्तो व्यवहारलाई ‘दु:खद, निन्दनीय र लाजास्पद’ भनेका छन्।
जसपा नेपालले सहिदहरूको सम्मानमा लहानजस्तो ऐतिहासिक भूमिमा समेत मौन रहनु पार्टीको मूल्य र सिद्धान्तप्रतिको बेवास्ता हो भन्ने सन्देश प्रवाह भएको छ। सहिदको बलिदानबाट बनेको पार्टी आज त्यही बलिदानलाई विस्मरण गर्दै अगाडि बढ्न खोज्नु आफैँमा गम्भीर राजनीतिक विचलन हो।