जे.एस. मुरारका क्याम्पसमा मनोनयन पत्र विवाद,विद्यार्थी संगठनहरूको तालाबन्दी

महेश सिंह लहान- सिरहाको लहानस्थित जे.एस. मुरारका बहुमुखी क्याम्पस मा छात्रसंघ निर्वाचनको मनोनयन पत्र वितरणमा विवाद उत्पन्न भएपछि विद्यार्थी संगठनहरूले क्याम्पसमा तालाबन्दी गरेका छन्।
क्याम्पस प्रमुख सञ्जय चौधरी द्वारा मनोनयन पत्र नदिइएको भन्दै समाजवादी विद्यार्थी युनियन नेपाल, अखिल क्रान्तिकारी र अनेरास्ववियु (एस) ले संयुक्त रूपमा क्याम्पस प्रमुखको कार्यकक्ष र निर्वाचन कार्यालयमा अनिश्चितकालीन तालाबन्दी गरेका हुन्।

निर्वाचन प्रक्रियामा निष्पक्षता नभएको आरोप लगाउँदै समाजवादी विद्यार्थी युनियन नेपालसहितका संगठनहरूले आन्दोलन चर्काएका छन्। उनीहरूले मनोनयन पत्र नपाएका अन्य विद्यार्थी संगठनहरूसँग मिलेर आन्दोलनलाई तीव्र बनाउने चेतावनी दिएका छन्।
यता, क्याम्पस प्रशासन र निर्वाचन समितिले विवाद समाधानका लागि छलफल भइरहेको बताएको छ। आउँदो चैत्र ५ गतेका लागि तय गरिएको निर्वाचन प्रभावित हुने देखिएको छ, किनकि चुनावी सरगर्मी बढ्दै जाँदा विद्यार्थीबीच आक्रोश चुलिएको छ।

विवाद समाधानका लागि क्याम्पस प्रशासन, विद्यार्थी संगठन र निर्वाचन समितिबीच समन्वय आवश्यक देखिएको छ। यदि सहमति नभएमा निर्वाचन प्रक्रिया अन्योलमा पर्न सक्ने आँकलन गरिएको छ।