महेश सिंह लहान – सुरुङ्गा नगरपालिका वडा नम्बर २ को आयोजनामा नवप्रवेशी तथा सेवा निवृत्त शिक्षकहरूको स्वागत,बिदाई तथा शुभकामना कार्यक्रम भव्य रूपमा सम्पन्न भएको छ। सप्तरीको भेडियास्थित होटल वृन्दावनमा आयोजित उक्त कार्यक्रममा शिक्षक सम्मानसँगै हाजिरीजवाफ प्रतियोगिता समेत आयोजना गरिएको थियो।
कार्यक्रम वडा अध्यक्ष अर्जुन खपाङ्गीको अध्यक्षतामा सम्पन्न भएको थियो। प्रमुख अतिथि नगर उप–प्रमुख रुद्र बहादुर कार्की रहनुभएको कार्यक्रममा शिक्षा शाखा प्रमुख हिरा लाल राना, ईलाका प्रहरी कार्यालय भेडियाका प्रहरी निरीक्षक रञ्जन गिरी, शिशवारी क्याम्पस प्रमुख कृष्ण तिमल्सिना,माओवादी नेता शिवा थारु लगायत विशिष्ट व्यक्तित्वहरूको उपस्थिति रहेको थियो।
कार्यक्रमका क्रममा शिक्षक सेवा परीक्षा उत्तीर्ण गरी शिक्षण पेशामा प्रवेश गरेका कोशीका कुमारी आले मगर, सुनिता कुमारी चौधरी,छबिलाल मगर, बिबेकानन्द चौधरी लगायतका नवप्रवेशी शिक्षकलाई प्रशंसा पत्रसहित सम्मान गरिएको थियो। त्यस्तै, शिक्षण सेवाबाट अवकाश प्राप्त गरेका बच्चे लाल चौधरी र अन्नती लाल चौधरीलाई उच्च सम्मानका साथ बिदाई गरियो।
शिक्षा क्षेत्रको प्रवर्द्धनका लागि डिजिटल हाजिरीजवाफ प्रतियोगिता पनि सञ्चालन गरिएको थियो। प्रतियोगितामा नगरपालिकाभित्रका पाँच विद्यालय र दुई बाल क्लबको सहभागिता रहेको थियो।
प्रतियोगितामा जन प्रवात मावि, दौतलपुर प्रथम स्थान हासिल गर्न सफल भयो भने जनता मावि, भेडिया दोस्रो तथा सरस्वती चाइल्ड क्लब, कमलपुर तेस्रो भए। सान्त्वना पुरस्कार शाइनिङ स्टार चाइल्ड क्लब, जनता मावि शिशुवरी र शुभकामना चाइल्ड क्लब, मावि मलहनामाले प्राप्त गरे। विजयी विद्यार्थीहरूलाई ट्रफी, मेडल र टीका लगाएर सम्मान गरियो।
कार्यक्रमलाई सम्बोधन गर्दै प्रमुख अतिथि कार्कीले शिक्षा र स्वास्थ्य क्षेत्रमा स्थानीय सरकार अझ बढी सक्रिय हुनुपर्नेमा जोड दिनुभयो। उहाँले गुणस्तरीय शिक्षाका लागि यस्ता कार्यक्रमले शिक्षक र विद्यार्थी दुवैलाई हौसला प्रदान गर्ने बताउनुभयो।
सभाध्यक्ष खपाङ्गीले वडास्तरीय रूपमा पहिलोपटक यति ठूलो कार्यक्रम आयोजना गरिएको उल्लेख गर्दै विद्यार्थीहरूलाई लोक सेवा तथा सरकारी सेवामा आकर्षित गर्ने उद्देश्य रहेको बताउनुभयो।
उक्त कार्यक्रम वडा कार्यालयको आयोजनामा स्थानीय सनसाइन बोर्डिङ स्कुलको सहकार्यमा सम्पन्न भएको थियो। सहभागीहरूका अनुसार यस्ता कार्यक्रम निरन्तर सञ्चालन गरिए शिक्षाक्षेत्रमा सुधार ल्याउन सकिने विश्वास गरिएको छ।
Discussion about this post