महेश सिंह लहान – सिरहाको लहान-३ स्थित रोयल सपटेक कलेजका संस्थापक तथा प्रिन्सिपल वरिष्ठ समाजसेवी डा. महादेव साहको नेतृत्वमा जीर्ण अवस्थामा रहेको प्राचीन शिव मन्दिरको पुनर्निर्माण कार्य तीव्र रूपमा अगाडि बढिरहेको छ। धार्मिक आस्था राख्दै, समाजसेवा र धार्मिक संरक्षणका क्षेत्रमा योगदान पुर्याउँदै आएका डा. साहले व्यक्तिगत लगानीमा मन्दिर मर्मत तथा पुनर्निर्माणको सम्पूर्ण खर्च व्यहोर्ने घोषणा गरेका छन्।
वरिष्ठ समाजसेवी तथा बौद्धिक सामाजिक चिन्तक डा. साहले धर्म मानव जीवनको शान्ति, सकारात्मक सोच र मानसिक सन्तुलनको आधार भएको बताउँदै यसको संरक्षण र प्रवर्द्धन गर्नु प्रत्येक जिम्मेवार नागरिकको कर्तव्य भएको धारणा व्यक्त गरेका छन्। उनका अनुसार धर्मले मानिसलाई तनावमुक्त बनाउनुका साथै सहि मार्गतर्फ प्रेरित गर्छ, जसले समाजमा नैतिकता र संस्कारको जग बसाउँछ।
पुनर्निर्माण कार्य तीव्र गतिमा अगाडि बढिरहेको जानकारी गराउँदै स्थानीय धर्मगुरु बाबा गोपाल दासले आगामी शिवरात्रिको पावन अवसरअघि नै सम्पूर्ण निर्माण कार्य सम्पन्न गरिने विश्वास व्यक्त गरेका छन्। मन्दिर पुनर्निर्माणपछि स्थानीय भक्तजन तथा श्रद्धालुहरूलाई अझ सहज रूपमा पूजाआजा गर्न सकिनेछ भने धार्मिक तथा सांस्कृतिक गतिविधिहरूको प्रवर्द्धन हुने अपेक्षा गरिएको छ।
धार्मिक तथा सामाजिक क्षेत्रका अग्रणी व्यक्तित्वका रूपमा पहिचान बनाएका डा. महादेव साहको यो योगदान केवल मन्दिर पुनर्निर्माणमा सीमित नरही धार्मिक सहिष्णुता, संस्कृतिक महत्व र समाजिक रूपान्तरणको उदाहरणीय कार्यका रूपमा रहनेछ। स्थानीय बासिन्दाहरू, धार्मिक अभियन्ताहरू तथा भक्तजनहरूले समेत यस पुण्य कार्यको खुलेर प्रशंसा गरेका छन्।
Discussion about this post