महेश सिंह लहान – सिरहाको गोलबजार नगरपालिका १२ निवासी राजेश ठाकुरलाई, जसको दुबै मिर्गौला फेल भइसकेका छन्, उपचारका लागि २०,०५५ रुपैयाँ आर्थिक सहयोग प्रदान गरिएको छ। जय माँ लक्ष्मी युवा समाज कल्याण सेवा नेपालद्वारा आयोजित विशेष कार्यक्रममार्फत उक्त सहयोग रकम हस्तान्तरण गरिएको हो।
उक्त सहयोग समाजसेवी तथा शुभेच्छुकहरूको निरन्तर प्रयासबाट संकलित रकम हो, जसले ठाकुरको उपचार तथा औषधोपचारमा महत्वपूर्ण टेवा पुर्याउने अपेक्षा गरिएको छ। कार्यक्रमका क्रममा संस्थाका पदाधिकारीहरूले ठाकुरको शीघ्र स्वास्थ्यलाभको कामना गर्दै थप सहयोग संकलनका लागि आम नागरिकलाई आह्वान गरेका छन्।
जय माँ लक्ष्मी युवा समाज कल्याण सेवा नेपाल विगत केही वर्षदेखि विपन्न, सीमान्तकृत, अपाङ्ग तथा दीर्घरोगीहरूलाई सहयोग गर्दै आइरहेको संस्था हो। विशेषगरी वैदेशिक रोजगारीमा रहेका युवाहरूको पहलमा स्थापित यस संस्थाले विभिन्न स्रोतबाट संकलित रकमलाई वास्तविक पीडितहरूलाई हस्तान्तरण गर्दै आएको छ।
मधेस प्रदेशका सञ्चालक टीकाराम राम मोचीका अनुसार, राजेश ठाकुरको आर्थिक अवस्था अत्यन्तै कमजोर भएकाले संस्थाले अग्रसरता लिँदै सहयोग उपलब्ध गराएको हो। संस्थाका अध्यक्ष स्वयं पीडितको घरमै पुगेर नगद हस्तान्तरण गरेका थिए। सहयोग प्राप्त गरेपछि ठाकुरले आफू आशावादी रहेको बताउँदै सहयोगी मनहरू प्रति आभार व्यक्त गरेका छन्।
राजेश ठाकुरको उपचारका लागि अझै थप आर्थिक सहयोग आवश्यक रहेको उनका परिवारजनले बताएका छन्। इच्छुक व्यक्तिहरूले ठाकुरको परिवार वा सम्बन्धित संस्थासँग सम्पर्क गरी थप सहयोग गर्न सक्ने जानकारी दिइएको छ।
पीडित ठाकुरको शीघ्र स्वास्थ्यलाभको कामना गर्दै, जय माँ लक्ष्मी युवा समाज कल्याण सेवा नेपालले अन्य सहयोगी मनहरूलाई पनि सहयोगका लागि प्रेरित गरेको छ।
Discussion about this post