डा. राम नाथ यादवको हृदयघातका कारण निधन सिरहाले गुमायो शिक्षा क्षेत्रको एउटा स्तम्भ

शिक्षा क्षेत्रले एक कुशल प्राध्यापक गुमायो: डा. राम नाथ यादवको हृदयघातका कारण निधन

महेश सिंह ,सिरहा लहान – नवराजपुर गाउँपालिका–३, मझौराका डा. राम नाथ यादवको ५५ वर्षको उमेरमा आइतबार बिहान हृदयघातका कारण निधन भएको छ। उनको आफ्नै निवास लहान नगरपालिका–१, कृष्णटोलमा बिहान करिब ५ बजे निधन भएको परिवारजनले बताएका छन्।
डा. यादव लहानस्थित जेएस मुरारका बहुमुखी क्याम्पसका प्राध्यापक तथा प्लस टु संयोजक थिए। उनले विद्याभारतीसम्म (पीएचडी) अध्ययन गरेका थिए। २५ वर्षभन्दा बढी समयदेखि शिक्षण पेशामा सक्रिय यादव अङ्ग्रेजी विषयका अब्बल प्राध्यापकका रूपमा चिनिन्थे।
तत्कालीन मझौरा गाबिस–४ मा जन्मिएका यादव स्वर्गीय रामप्रसाद यादवका जेठा छोरा हुन्। गरिबीको रेखामुनि हुर्किए पनि उनले शिक्षामा लगनशीलता देखाउँदै उच्च अध्ययन पुरा गरेका थिए। तीन भाइमध्ये जेठा यादव बाल्यकालदेखि नै पढाइमा अब्बल र परिश्रमी थिए।
प्राध्यापक यादव शिक्षामा आफ्नो योगदानका कारण सिरहा जिल्लाभर ख्यातिप्राप्त थिए। शिक्षा क्षेत्रमा उहाँको इमानदारी, अनुशासन र समर्पणलाई विद्यार्थी र सहकर्मीहरूले प्रेरणाको स्रोतका रूपमा लिएका थिए। उहाँ दार्शनिक सोच र इमानदारीको उदाहरणीय प्रतीकका रूपमा स्मरण गरिन्छ।
डा. यादवको निधनले शैक्षिक क्षेत्रमा अपूरणीय क्षति पुगेको बताइएको छ। सिरहाका अधिकांश शैक्षिक संस्थाले आइतबार शोकमा बिदा दिएका छन्। जेएस कलेजका प्राध्यापक संजय कुमार साहले निधनको खबर लगत्तै यादवको निवास पुगेको र यो घटना शिक्षाका लागि ठूलो क्षति भएको बताए।
डा. यादवले श्रीमती, एक छोरा र एक छोरीलाई पछाडि छोडेका छन्। उनका दुई भाइ शिवनाथ यादव र सूर्यनाथ यादव छन्। उनको आमालाई गाउँमा कटैया बाली भनेर चिन्थ्यो र चर्चित धार्मिक महिला थिए। डा. यादवप्रति सिरहाका शिक्षण संस्था, सहकर्मी र विद्यार्थीहरूले गहिरो शोक व्यक्त गरेका छन्। शिक्षा क्षेत्रमा गरेको उनको योगदान सदैव स्मरणीय रहनेछ।