गाउँ सुधार समितिद्वारा सिरहा लक्ष्मीपुर पतारीमा पालिका स्तरीय हाजिरीजवाफ प्रतियोगिता सम्पन्न

लहान, सिरहा – सिरहाको लक्ष्मीपुर पतारी गाउँपालिका वडा नं. २ मा गाउँ सुधार समिति पर्सा पोखरभिण्डाद्वारा आयोजित पालिका स्तरीय हाजिरीजवाफ प्रतियोगिता २०८१ भव्य रूपमा सम्पन्न भएको छ। यस प्रतियोगितामा गाउँपालिकाका पाँच विद्यालयले सहभागिता जनाएका थिए।

विद्यार्थीहरूलाई अध्ययनप्रति प्रेरित गर्नुका साथै लोक सेवा र शैक्षिक क्षेत्रमा जागरण ल्याउने उद्देश्यले आयोजना गरिएको प्रतियोगितामा धमियाईन माध्यमिक विद्यालय, महेशपुर पतारीले प्रथम स्थान हासिल गरेको छ। दोस्रो स्थानमा रामा महन्थी यादव माध्यमिक विद्यालय, सितापुर प्र.ध. रहेको छ भने तेस्रो स्थान जनता माध्यमिक विद्यालय, खरुकियाहीले प्राप्त गरेको छ। चौथो र पाँचौँ स्थान क्रमशः जनता डोमि चौधरी माध्यमिक विद्यालय, बिप्प, र जनता नन्द ललिता माध्यमिक विद्यालय, लक्ष्मीपुर पतारीले ओगटेका छन्।

कार्यक्रममा स्थानीय शिक्षाविद्, अभिभावक र विद्यार्थीहरूको उल्लेखनीय उपस्थिति रहेको थियो। प्रमुख अतिथि वडा अध्यक्ष सूर्य नारायण चौधरीले कार्यक्रमलाई सफलतापूर्वक सम्पन्न गर्न सक्रिय भूमिका निर्वाह गरेका थिए। गाउँ सुधार समितिका वरिष्ठ सल्लाहकार चन्द्र शेखर यादवको विशेष नेतृत्वमा कार्यक्रम अघि बढेको थियो भने समाजसेवी पंकज यादवले कार्यक्रमको सञ्चालन गरेका थिए।

प्रतियोगितामा उत्कृष्ट प्रदर्शन गर्ने विद्यालयहरूलाई प्रमाणपत्र र ट्रफीले सम्मानित गरिएको छ। आयोजक समितिका अध्यक्षले भविष्यमा यस्ता कार्यक्रमलाई निरन्तरता दिँदै विद्यार्थीहरूको शैक्षिक प्रगति र व्यक्तित्व विकासका लागि थप प्रभावकारी योजनाहरू ल्याउने प्रतिबद्धता व्यक्त गरे।

उक्त प्रतियोगिता स्थानीय विद्यार्थीहरूलाई शैक्षिक गतिविधिप्रति प्रेरित गर्न र सरकारी सेवामा संलग्न हुन प्रोत्साहित गर्नको लागि एक उदाहरणीय प्रयास भएको सहभागीहरूले बताएका छन्।