बर्छवामा छैठौँ थारु माघी महोत्सव भव्य रूपमा सम्पन्न

महेश सिंह लहान-“आफ्नो संस्कृति, आफ्नै पहिचान—सबै मिलेर गरौँ उत्थान” भन्ने मूल नाराका साथ थारु समुदायका युवावर्ष थारु संवत् २६४९ को अवसरमा आयोजित छैठौँ थारु माघी महोत्सव २०८२ लहान नगरपालिका–२२ स्थित धाती खेलकुद मैदान, बर्छवा मा भव्य रूपमा सम्पन्न भएको छ।
दर्शक–श्रोता तथा शुभेच्छुकहरूको उल्लेखनीय उपस्थितिमा सम्पन्न महोत्सवले थारु समुदायको भाषा, संस्कृति, पहिचान तथा मौलिक परम्पराको संरक्षण र प्रवर्द्धनमा महत्वपूर्ण योगदान पुर्‍याएको आयोजकको भनाइ छ।
बर्छवा सामुदायिक युवा मञ्चद्वारा बृहत् रूपमा आयोजना गरिएको उक्त महोत्सवबारे माघी महोत्सव समिति तथा श्री बर्छवा सामुदायिक युवा मञ्चका अध्यक्ष दिलीप चौधरी ले जानकारी दिनु भयो। उहाँका अनुसार, माघी महोत्सवले समुदायबीच आपसी एकता, सहकार्य र सांस्कृतिक चेतनालाई थप सुदृढ बनाएको छ।
कार्यक्रमका प्रमुख अतिथि युवा तथा खेलकुद मन्त्री बब्लु गुप्ता ले सबै जातजातिले आफ्नो मौलिक संस्कृति र पहिचान जोगाएर राख्नुपर्नेमा जोड दिनु भयो। मन्त्री गुप्ताले हरेक समुदायलाई जोडेर आयोजना गरिएको माघी महोत्सव प्रशंसनीय रहेको उल्लेख गर्दै, यस्ता कार्यक्रमहरूले सामाजिक सद्भाव र राष्ट्रिय एकतालाई मजबुत बनाउने बताउनु भयो।
महोत्सवमा विभिन्न सांस्कृतिक झाँकी, मौलिक नृत्य, गीत–संगीत तथा परम्परागत कार्यक्रमहरू प्रस्तुत गरिएका थिए। कार्यक्रममा उल्लेखनीय सहभागिता र सफल आयोजनाका लागि मन्त्री गुप्ताले बर्छवा सामुदायिक युवा मञ्च, अध्यक्ष दिलीप चौधरी लगायत सम्पूर्ण आयोजक टिमलाई बधाई तथा शुभकामना व्यक्त गर्नु भयो।