महेश सिंह लहान – सिरहाको भगवानपुर गाउँपालिकामा कृषकको पोषणस्तर सुधार र आयआर्जन वृद्धि गर्ने उद्देश्यले चारदिने जलवायु अनुकूल कृषि तालिम सम्पन्न भएको छ। पुष २२ गतेदेखि २५ गतेसम्म सञ्चालन गरिएको तालिममा पालिकाभरिका ३१ वटा कृषक समूहका अगुवा कृषकहरूको सहभागिता रहेको कृषि तथा बजारीकरण अधिकृत डिनिता साहले जानकारी दिनुभयो।
तालिमको मुख्य उद्देश्य स्थानीयस्तरमा एकीकृत पोषण बगैंचा स्थापना गर्दै रसायनमुक्त कृषि उत्पादन बढाउनुका साथै सिमान्तकृत तथा विपन्न समुदायको पोषणस्तर सुधार गर्नु रहेको आयोजकले जनाएको छ। जलवायु परिवर्तनको प्रभाव न्यूनीकरण गर्दै कृषि उत्पादनलाई दिगो बनाउने विषयमा विशेष जोड दिइएको थियो।
तालिममा पोषण बगैंचा निर्माण, माटो परीक्षण, नर्सरी व्यवस्थापन, जैविक खेती, एकीकृत शत्रुजीव व्यवस्थापन, बजार व्यवस्थापन तथा फार्म–टु–मार्केट अवधारणाबारे सहजीकरण गरिएको लैङ्गिक समानता तथा सामाजिक समावेशीकरण अधिकृत अस्मिता कुमारी चौधरीले बताउनुभयो।
तालिम उद्घाटन कार्यक्रमको अध्यक्षता गाउँपालिका अध्यक्ष उग्रनारायण यादवले गर्नुभएको थियो भने समापन कार्यक्रममा गाउँपालिकाकी उपाध्यक्ष रेखा कुमारी यादव तथा प्रमुख प्रशासकीय अधिकृत प्रमोद कुमार साहको उपस्थिति रहेको थियो।
तालिमको सहजीकरण कृषि तथा बजारीकरण अधिकृत डिनिता साह, लैङ्गिक समानता तथा सामाजिक समावेशीकरण अधिकृत अस्मिता कुमारी चौधरी, स्वास्थ्य चौकी इन्चार्ज शिव कुमार यादव, कृषि शाखा प्रमुख बलमिन्द्र कुमार यादव, पशु शाखा अधिकृत रामसुन्दर दास लगायत प्रशिक्षकहरूले गर्नुभएको थियो। उनीहरूले जलवायु मैत्री कृषि अभ्यास, मूल्य शृङ्खलामार्फत आम्दानी वृद्धि तथा दिगो कृषि प्रणालीबारे प्रशिक्षण दिएका थिए।
तालिममा सहभागी कृषकलाई विभिन्न तरकारीका बीउ तथा कृषि सामग्री वितरण गरिएको थियो। समापन कार्यक्रममा सहभागी अगुवा कृषकलाई प्रमाणपत्र वितरण गरिएको महासंघले जनाएको छ।
तालिमबाट प्राप्त ज्ञान व्यवहारमा उतार्न सके कृषकको उत्पादन र आर्थिक अवस्थामा उल्लेख्य सुधार आउने अपेक्षा गरिएको छ। पालिकाको समन्वय र सहकार्यमा कार्यक्रम सञ्चालन गरिएको र आगामी दिनमा यस्ता तालिम निरन्तर आवश्यक रहेको सहभागी कृषकहरूले बताएका छन्। महासंघका मधेस प्रदेश सचिव यामुन प्रसाद यादव, पालिका अध्यक्ष रामचन्द्र यादव तथा कृषि तथा बजारीकरण सहजकर्ता देव नारायण चौधरीले यसबारे जानकारी दिनु भएको छ।
Discussion about this post