महेश सिंह लहान सिरहा-निजी तथा आवासीय विद्यालयहरूको छाता संगठन प्याब्सनले आयोजना गरेको दोस्रो जिल्ला परिषद–२०८२ सिरहामा भव्य रूपमा सम्पन्न भएको छ। परिषदमा जिल्लाको शैक्षिक अवस्था, एस.ई.ई. परीक्षाको नतिजा, साक्षरता अवस्था र शिक्षा सुधारका चुनौतीमाथि गम्भीर छलफल गरिएको छ।
कार्यक्रमका प्रमुख अतिथि तथा जिल्ला शिक्षा अधिकारी दिपक राज कोलोनीले वर्तमान शिक्षा प्रणाली केवल पाठ्यक्रममा सीमित रहँदा विद्यार्थी व्यवहारिक रूपमा सक्षम हुन नसकेको बताए। उनले शिक्षालाई लाइफ स्किलमा आधारित बनाउनुपर्ने आवश्यकता औँल्याउँदै साक्षर जिल्ला घोषणा गर्न स्थानीय तह सबल र सक्षम हुनुपर्नेमा जोड दिए। पहिलाको शिक्षा र अहिलेको शिक्षाबीच ठूलो गुणात्मक अन्तर आएको भन्दै उनले विद्यालय अनुगमनको वातावरण कमजोर हुनु र स्थानीय तहमा शिक्षा अधिकृतको अभाव चुनौतीका रूपमा रहेको उल्लेख गरे।
प्याब्सनका केन्द्रीय सचिव विष्णु न्यौपानेले एस.ई.ई. परीक्षामा करिब ३५ प्रतिशत विद्यार्थीहरू पाखा लाग्ने अवस्थाले शिक्षा प्रणालीमै गम्भीर प्रश्न खडा गरेको बताए। काखा–पाखा नगरी सबै विद्यार्थीलाई समान अवसर दिनुपर्नेमा जोड दिँदै उनले भने, “हामी अन्यायमा भाग खोजेको होइन, यही जिल्ला र यही समाजको भविष्य सुरक्षित गर्न खोजिरहेका हौं।”
उनले परीक्षाको नाममा विद्यार्थीलाई मानसिक रूपमा त्रसित बनाउने प्रवृत्तिको आलोचना गर्दै साक्षरताको हिसाबले सिरहा अझै पछाडि रहेको उल्लेख गरे। “परीक्षा घाँटी निमोठ्ने माध्यम बन्नु हुँदैन,” भन्दै उनले सामाजिक उत्तरदायित्वसहित शिक्षा सुधारमा सबै पक्षको सहकार्य आवश्यक रहेको धारणा राखे।
प्याब्सन सिरहाका अध्यक्ष उमेश चौधरीको अध्यक्षतामा सम्पन्न परिषदमा मधेस प्रदेश वरिष्ठ उपाध्यक्ष मुरारी प्रसाद साह, सिरहा वरिष्ठ उपाध्यक्ष उमेश कुमार यादव, सल्लाहकार राकेश झा, शंकरप्रसाद गुप्ता लगायत प्याब्सन आबद्ध प्रतिनिधिहरूको सहभागिता रहेको थियो।
यसैगरी आमन्त्रित अतिथि लक्ष्मण चौधरी, जिल्ला उद्योग वाणिज्य संघ सिरहा–लहानका सल्लाहकार रविन्द्र श्रेष्ठ सहित सयौं शैक्षिक व्यक्तित्वहरूको उपस्थिति रहेको परिषदले सिरहाको शिक्षा सुधारका लागि ठोस, दीर्घकालीन र समन्वित पहल आवश्यक रहेको निष्कर्ष निकालेको छ।
Discussion about this post