महेश सिंह लहान सिरहा –मधेश प्रदेशका भौतिक पूर्वाधार विकास मन्त्री माननीय राजकुमार गुप्ताले मधेश आन्दोलनका सहिदहरूको स्मृतिमा लहान र सखुवानन्कारकट्टीमा सम्पन्न श्रद्धाञ्जली कार्यक्रमलाई केवल औपचारिक कर्तव्यमा सीमित नराखी भविष्यप्रतिको राजनीतिक र विकासीय प्रतिबद्धतासँग जोड्नुभएको छ।
लहान चोकमा स्थापित मधेश आन्दोलनका प्रथम सहिद रमेश महतोसहितका सहिद प्रतिमाहरू तथा सखुवानन्कारकट्टी गाउँपालिका–३ मिर्जापुरस्थित सहिद प्रमोद सदा (सदाय)को प्रतिमामा माल्यार्पण गर्दै मन्त्री गुप्ताले सहिदको बलिदानलाई विकासको दिशासँग गाँस्नुपर्ने आवश्यकता औँल्याउनुभयो। सहिद प्रमोद सदाको आमालाई साल ओढाएर गरिएको सम्मानले कार्यक्रमलाई अझ भावनात्मक बनाएको थियो।
कार्यक्रमलाई सम्बोधन गर्दै मन्त्री गुप्ताले सहिदहरूको त्याग केवल इतिहासमा सीमित नरहने स्पष्ट पार्दै त्यसको वास्तविक सम्मान समावेशी विकास, सुशासन र दिगो पूर्वाधार निर्माणमार्फत हुनुपर्ने धारणा व्यक्त गर्नुभयो। “सहिदले देखाएको सपना पूरा गर्नु सरकारको जिम्मेवारी हो, र त्यो सपना विकास, समानता र पहिचानसँग जोडिएको छ,” उहाँले भन्नुभयो।
२०६३ सालको मधेश आन्दोलनका क्रममा लहान क्षेत्रमा रमेश महतो, प्रमोद सदा (सदाय), बेचन यादव, विजय सहनी र मोहम्मद अनिस अन्सारीले दिएको सहादतले आज मधेशलाई अधिकार र पहिचानको बाटोमा अघि बढ्न प्रेरित गरेको उल्लेख गर्दै मन्त्री गुप्ताले सहिदको आदर्शलाई नीतिगत र व्यवहारिक कार्यमा उतार्ने प्रतिबद्धता जनाउनुभयो।
श्रद्धाञ्जली कार्यक्रममा सहभागी वक्ताहरूले मन्त्री गुप्ताको अनुभव र स्पष्ट दृष्टिकोणले मधेश प्रदेशको भौतिक पूर्वाधार, सडक, यातायात र समग्र विकास प्रक्रियामा नयाँ गति आउने विश्वास व्यक्त गरे। सहिदको स्मरणसँगै विकासको एजेन्डालाई अघि सारिएको यस कार्यक्रमले जनतामा आशा र भरोसा बढाएको उनीहरूको भनाइ थियो।
कार्यक्रममा जनता समाजवादी पार्टी, नेपालका केन्द्रीय सदस्य सत्यनारायण यादव, प्रदेश सांसद ललिता दास, जसपा नेपाल लहान नगर समितिका अध्यक्ष राम उदगार महतो, पूर्व वडा अध्यक्ष राकेश गुप्तालगायत पार्टी नेता तथा कार्यकर्ताहरूको उल्लेख्य उपस्थिति रहेको थियो।
समग्रमा, श्रद्धाञ्जली कार्यक्रमले विगतको बलिदान र वर्तमानको दायित्वलाई जोड्दै मधेश प्रदेशको भविष्य निर्माणमा एकजुट भएर अघि बढ्ने सन्देश दिएको सहभागीहरूको धारणा रहेको छ।
Discussion about this post