समृद्धि फाइनान्स कसहा शाखाद्वारा रक्तदान कार्यक्रम सम्पन्न, २३ जनाको स्वेच्छिक सहभागिता

महेश सिंह लहान सिराहा-समृद्धि फाइनान्स कम्पनी लिमिटेड शाखा कसहाको आयोजना तथा नेपाल रेडक्रस सोसाइटी उपशाखा धनगढीको समन्वयमा रक्तदान कार्यक्रम सफलतापूर्वक सम्पन्न भएको छ।
रगतको अभावका कारण कसैले पनि ज्यान गुमाउनु नपरोस् भन्ने मानवीय उद्देश्यसहित आयोजना गरिएको कार्यक्रममा २३ जना रक्तदाताले स्वेच्छाले रक्तदान गरेका थिए। कार्यक्रमले समुदायमा रक्तदानप्रतिको सचेतना अभिवृद्धि गर्नुका साथै आपतकालीन अवस्थामा आवश्यक रगतको उपलब्धतामा सहयोग पुर्‍याउने विश्वास आयोजकले व्यक्त गरेका छन्।
कार्यक्रममा धनगढीमाइ नगरपालिका–०८ का अध्यक्ष रामभरोस महतो प्रमुख अतिथिका रूपमा सहभागी हुनुहुन्थ्यो। साथै पद्मोदय फाउन्डेशनका अध्यक्ष समाजसेवी दीपेन्द्र महतो, नेपाल रेडक्रस सोसाइटी धनगढी उपशाखाका अध्यक्ष गङ्गाराम यादव, वडा नं. ७ का सदस्य रामखेलावन महतो, राजकुमार महतो, सिराहा समाजसेवा आमजन्ता साउदीका अध्यक्ष निसान महतो, स्थानीय युवा नेता पवन कुमार यादव, योगेश सिंह, अशोक महतो, समृद्ध पाठशालाका प्रिन्सिपल प्रेम महतो, NLG इन्स्योरेन्सका शाखा प्रमुख भुवन महतो, पत्रकार बद्रीनारायण महतो, अनिल सिंह, सन्जिप सिंह, बिनोद ठाकुरलगायत स्थानीय युवा तथा बुद्धिजीवीहरूको उल्लेख्य उपस्थिति रहेको थियो।
सहभागीहरूले यस्ता सामाजिक उत्तरदायित्वका कार्यक्रमले समाजमा सकारात्मक प्रभाव पार्ने र सामुदायिक ऐक्यबद्धता बलियो बनाउने धारणा व्यक्त गरेका छन्। समृद्धि फाइनान्सले सामाजिक उत्तरदायित्वअन्तर्गत शिक्षा, स्वास्थ्य तथा मानवीय सेवासँग सम्बन्धित विभिन्न सामाजिक कार्यक्रमहरू गर्दै आएको जनाउँदै आगामी दिनमा पनि यस्ता कार्यक्रमलाई निरन्तरता दिने प्रतिबद्धता व्यक्त गरेको छ।
हाल समृद्धि फाइनान्स कम्पनी लिमिटेडले आफ्ना १३ वटा शाखामार्फत कर्जा, बचत, रेमिट्यान्स, CIPS, RTGS, ECC लगायतका आधुनिक बैंकिङ सेवाहरू प्रदान गर्दै आएको जानकारी कम्पनीका प्रबन्धक प्रदीप कुमार महतोले दिनुभयो।