आगलागीपीडित परिवारलाई जाडोबाट जोगाउन राहत वितरण

महेश सिंह लहान सिरहा –लक्ष्मीपुर पतारी गाउँपालिका वडा नं. २, पोखरभिन्ड्डामा केही दिनअघि भएको आगलागीबाट प्रवीण कामैत र नविन कामैतको घर पूर्ण रूपमा जलेर नष्ट भएपछि पीडित परिवारलाई राहत सामग्री वितरण गरिएको छ।
लायन्स क्लब अफ फूलबारीको पहल तथा स्थानीय सहयोगमा आगलागीपीडित परिवारलाई जाडोबाट जोगाउने उद्देश्यले ब्ल्यांकेट, त्रिपाल र बालबालिकाका लागि स्विटर वितरण गरिएको हो। आगलागीपछि खुला आकाशमुनि बस्न बाध्य परिवारलाई तत्काल राहत पुर्‍याउने उद्देश्यले सहयोग गरिएको बताइएको छ।

राहत वितरण कार्यक्रममा सहभागीहरूले विपद्को घडीमा मानवीय सहयोग सबैको साझा दायित्व भएको बताएका छन्। उनीहरूका अनुसार पीडित परिवारलाई अस्थायी आवास र दैनिक जीवनमा सहजता ल्याउने खालका सामग्री उपलब्ध गराइएको हो।

स्थानीयवासीहरूले लायन्स क्लब अफ फूलबारी र सहयोगी पक्षप्रति धन्यवाद व्यक्त गर्दै आगामी दिनमा पुनःस्थापना र दीर्घकालीन सहयोग आवश्यक रहेको बताएका छन्।