नवराजपुरमा एकीकृत जीविकोपार्जन तथा कृषि सुधार परियोजना शुभारम्भ

महेश सिंह लहान सिरहा- नवराजपुर गाउँपालिकामा एकीकृत जीविकोपार्जन तथा कृषि सुधार परियोजना (Integrated Livelihood and Agriculture – ILAP) को शुभारम्भ तथा अभिमुखीकरण कार्यक्रम सम्पन्न भएको छ। कार्यक्रम २०८२ पौष २३ गते नवराजपुर गाउँपालिकाको आयोजनामा सम्पन्न भएको हो।
नवराजपुर गाउँपालिका गाउँ कार्यपालिकाको कार्यालय, मधेस प्रदेशद्वारा आयोजित कार्यक्रममा कृषकको आयआर्जन वृद्धि, खाद्य सुरक्षामा सुधार तथा दिगो कृषि प्रणाली विकास परियोजनाको मुख्य उद्देश्य रहेको जनाइएको छ। परियोजनाले कृषिमा आधारित जीविकोपार्जनलाई प्रवर्द्धन गर्दै स्थानीय किसानलाई आत्मनिर्भर बनाउने लक्ष्य लिएको छ।
कार्यक्रममा सहभागी सरोकारवालाहरूलाई परियोजनाका गतिविधि, कार्यान्वयन प्रक्रिया र अपेक्षित उपलब्धिबारे अभिमुखीकरण गरिएको थियो। यसअन्तर्गत आधुनिक कृषि प्रविधि, जलवायु अनुकूल खेती प्रणाली, बजार पहुँच र कृषक समूह सशक्तीकरणका कार्यक्रम सञ्चालन गरिने जानकारी दिइयो।
परियोजना सञ्चालनमा MCC साझेदार संस्थाका रूपमा आबद्ध रहेको छ। साझेदारीमार्फत प्राविधिक सहयोग, क्षमता अभिवृद्धि र स्रोत व्यवस्थापनमा सहकार्य गरिने आयोजकले जनाएको छ।
कार्यक्रममा गाउँपालिका पदाधिकारी, जनप्रतिनिधि, कृषि प्राविधिक, कृषक समूह, महिला तथा युवा प्रतिनिधिहरूको उल्लेखनीय सहभागिता रहेको थियो। स्थानीय तह र साझेदार संस्थाबीचको सहकार्यले ग्रामीण अर्थतन्त्र सुदृढ बनाउने विश्वास व्यक्त गरिएको छ।