महेश सिंह सिरहा लहान-आठ वर्षअघि क्यान्सरका कारण बुवा गुमाउँदा मिर्चैयाका राजनारायण महतोको परिवारका लागि जीवन झन् कठिन बनेको थियो। गाउँमै सानो किराना पसल चलाउँदै आमा रेखा पंजियारले आँसु लुकाएर छोराहरूको सपना जोगाइन्। आज त्यही संघर्षको प्रतिफलस्वरूप राजनारायण एमबीबीएसमा पूर्ण छात्रवृत्तिमा नाम निकाल्न सफल भएका छन्।
आर्थिक अभाव हुँदाहुँदै पनि पढाइ नछोडेका राजनारायणलाई सुडी समाज, मिर्चैयाले मंगलबार ५१ हजार रुपैयाँ आर्थिक सहयोग गर्दै सम्मान गरेको छ। मिर्चैया नगरपालिका–६ मटियर्वास्थित सुडी समाज धर्मशालामा आयोजित कार्यक्रममा उनको संघर्ष र सफलतालाई समुदायले खुलेर सम्मान गरेको हो।
त्रिभुवन विश्वविद्यालय शिक्षण अस्पताल, महाराजगन्जमा भर्ना भएका राजनारायण पहिलो प्रयासमै एमबीबीएसमा पूर्ण छात्रवृत्तिमा छनोट भएका हुन्। उनले २०७९ सालमा एसईई र २०८२ मा कक्षा १२ उत्तीर्ण गरेका थिए।
परिवारको पीडामा पनि आशाको अर्को कथा जोडिएको छ। राजनारायणका जेठा दाजु राजु महतो पनि पूर्ण छात्रवृत्तिमै एमबीबीएस अध्ययनरत छन्।
आमाको अथक परिश्रम र अनुशासनले दुवै छोरालाई सेतो कोटको सपना देख्न सक्ने बनाएको हो।कार्यक्रममा सहभागीहरूले “गरिबीले सपना मार्दैन, अवसर र साथ मिले त्यसले उड्न सिकाउँछ” भन्दै राजनारायणको यात्रालाई समाजका युवाका लागि प्रेरणाको स्रोत भनेका छन्।
Discussion about this post