खडकपुरका ओमप्रकाशले पूर्ण छात्रवृत्तिमा एमबीबीएस नाम निकाले पैसाको चिन्तामा डुबदै

महेश सिंह लहान –सप्तरीको बोदे बरसाइन नगरपालिका–१० खडकपुरका ओमप्रकाश दासले एमबीबीएस प्रवेश परीक्षामा पूर्ण छात्रवृत्तिमा नाम निकाल्दै आफ्नो गाउँ मात्र होइन, सम्पूर्ण क्षेत्रका युवाका लागि प्रेरणादायी उदाहरण बनेका छन्।
दलित तथा विपन्न परिवारमा जन्मिएका ओमप्रकाशले कठिन आर्थिक अवस्थाका बाबजुद पढाइलाई निरन्तरता दिन बिजुली मिस्त्रीको काम गर्दै तयारी गरेका थिए। दिनभर श्रम र राति अध्ययनको अनुशासनले उनलाई आजको उपलब्धिसम्म पुर्‍याएको स्थानीयहरू बताउँछन्। उनको सफलताले खडकपुरसहित आसपासका गाउँमा उत्साह र गर्वको माहोल सिर्जना भएको छ।
गाउँलेहरू ओमप्रकाशको लगनशीलता, संघर्ष र मिहिनेतको खुलेर प्रशंसा गरिरहेका छन्। “परिस्थिति जति कठिन भए पनि लक्ष्यप्रति अडिग रहे सफलता सम्भव हुन्छ” भन्ने सन्देश उनले व्यवहारमै प्रमाणित गरेको उनीहरूको भनाइ छ। यही कारण अन्य बालबालिकालाई पनि ओमप्रकाशकै जस्तो लगनका साथ अध्ययन गर्न प्रेरित गरिँदैछ।
तर, यो उपलब्धिसँगै एउटा चुनौती पनि देखिएको छ। पूर्ण छात्रवृत्तिमा नाम निकाले तापनि होस्टेल तथा दैनिक बसोबास खर्च जुटाउन नसक्दा उनका आमाबुवा चिन्तित छन्। आर्थिक अभावका कारण ऋण पाउन कठिनाइ भइरहेको परिवारको गुनासो छ।
स्थानीय बुद्धिजीवी तथा सामाजिक अभियन्ताहरूले ओमप्रकाशजस्ता प्रतिभाशाली विद्यार्थीलाई स्थानीय तह, संघसंस्था तथा दातृ निकायले सहयोग गर्नुपर्ने आवश्यकता औँल्याएका छन्। उचित सहयोग पाएमा ओमप्रकाशको यो यात्रा मात्र होइन, समाज परिवर्तनतर्फको आशा पनि अझ सबल हुने उनीहरूको विश्वास गरेको हो।