महेश सिंह लहान सिरहा –गोलबजार क्षेत्रमा शैक्षिक मर्यादा र पेसागत जिम्मेवारीमाथि गम्भीर प्रश्न उठाउँदै विवादमा परेका एक शिक्षक नेकपा (एमाले) को महाअधिवेशनमा खुलेआम देखिएपछि शिक्षा प्रणालीको विश्वसनीयतामाथि बहस चर्किएको छ।
कानुनतः शिक्षकलाई सक्रिय राजनीतिबाट टाढा रहनुपर्ने व्यवस्था रहेको छ भने नैतिकताले उनीहरूबाट अझ उच्च मापदण्डको अपेक्षा गर्छ। तर विवादको घेरामा परेका शिक्षक नै राजनीतिक मञ्चमा निडर र सुरक्षित रूपमा उपस्थित देखिनुले कानुनी व्यवस्था र नैतिक मूल्य दुवै कमजोर बन्दै गएको संकेत दिएको सरोकारवालाहरू बताउँछन्।
यदि शैक्षिक मर्यादा उल्लंघनको आरोप खेपिरहेका शिक्षकहरूलाई कुनै प्रभाव नपर्ने हो भने, विद्यालयभित्र अनुशासन र उत्तरदायित्वको पाठ पढाइरहेका शिक्षकहरूको नैतिक आधार के रहने भन्ने प्रश्न उठेको छ। यसले विद्यार्थीहरूमा जाने सन्देशप्रति समेत गम्भीर चिन्ता व्यक्त गरिएको छ।
शिक्षाविद्हरूका अनुसार शिक्षकको सार्वजनिक आचरणले विद्यार्थीको सोच र व्यवहारमा प्रत्यक्ष प्रभाव पार्छ। “जब शिक्षक स्वयं नैतिक मापदण्डबाट विचलित देखिन्छन्, तब अनुशासन र जिम्मेवारीको शिक्षा खोक्रो बन्न जान्छ,” एक शिक्षा क्षेत्रका जानकारले भने।
यो घटनाले शिक्षा र राजनीति बीचको सीमारेखा झनै धमिलिएको अनुभूति गराएको छ। शिक्षा कि राजनीति? मर्यादा कि सत्ता? भन्ने प्रश्नसँगै अब यसको जवाफ कसले दिने भन्ने विषयमा स्थानीय स्तरदेखि केन्द्रीय निकायसम्म स्पष्ट जवाफ आवश्यक भएको सरोकारवालाहरूको भनाइ छ।
Discussion about this post