महेश सिंह लहान सप्तरी- सुरुङ्गा नगरपालिकाको आयोजना तथा सगरमाथा चौधरी आँखा अस्पताल, लहानको प्राविधिक सहयोगमा भेडिया, धाती बजार र माध्यमिक विद्यालय कुशहामा सञ्चालन गरिएको तीनदिने निःशुल्क आँखा शिविरमा ९५८ जना बिरामीको आँखा परीक्षण गरिएको छ।
शिविरमा परीक्षण गरिएकामध्ये ३४१ जनामा मोतियाविन्दुको समस्या पहिचान भएको आयोजकले जनाएको छ। पहिचान भएका बिरामीहरूको शल्यक्रिया (अपरेशन) खर्च, चश्मा तथा आवश्यक औषधि–सामग्रीको सम्पूर्ण खर्च सुरुङ्गा नगरपालिकाले व्यहोर्ने निर्णय गरेको छ।
नगरपालिकाका अनुसार दृष्टि समस्या भएका नागरिकलाई सहज रूपमा उपचार सेवा उपलब्ध गराउने उद्देश्यले शिविर सञ्चालन गरिएको हो। विशेष गरी आर्थिक रूपमा कमजोर तथा ग्रामीण क्षेत्रका बासिन्दालाई लक्षित गरी आयोजना गरिएको शिविरबाट उल्लेखनीय लाभ पुगेको नगरपालिकाले जनाएको छ।
सगरमाथा चौधरी आँखा अस्पतालका प्राविधिक टोलीले दक्ष जनशक्ति र आवश्यक उपकरणसहित शिविरमा सेवा प्रदान गरेको थियो। स्थानीयवासीले निःशुल्क आँखा जाँच तथा उपचारको व्यवस्थाप्रति नगरपालिकाप्रति धन्यवाद व्यक्त गरेका छन्।
Discussion about this post