कृषि मन्त्री पारियारसँगको भेटले सिरहाका किसानमा आशा जगायो

महेश सिंह लहान सिरहा- माननीय कृषि तथा पशुपन्छी विकास मन्त्री डा. मदन प्रसाद पारियारसँग भएको भेटघाटले सिरहाका किसानहरूमा नयाँ आशा र भरोसा जगाएको छ। भेटका क्रममा मन्त्री पारियारले किसानका दीर्घकालीन समस्या धैर्यपूर्वक सुन्दै समाधानप्रति गम्भीर प्रतिबद्धता व्यक्त गरेका छन्।

किसानका तर्फबाट प्रस्तुत गरिएका बिचौलियाको जालो, ऋण तथा अनुदानको अभाव, बिउ–मलको सहज उपलब्धता नहुनुजस्ता समस्यालाई मन्त्रीले गहिरो चासोका साथ सुनेका थिए। छलफलका क्रममा उनले “किसानको हातमा सेवा र सुविधा सिधै पुग्ने व्यवस्था गर्नु मेरो जिम्मेवारी हो” भन्दै राज्यको तर्फबाट सुधारको पहल गर्ने विश्वास दिलाएका छन्।

सिरहाका किसान प्रतिनिधिहरूले मन्त्रीसँगको संवादलाई आशावादी र प्रेरणादायी बताएका छन्। विशेषगरी नयाँ पुस्ताका (Gen-Z) युवाबाट प्रतिनिधित्व गर्ने मन्त्रीले किसानको आवाज नजिकबाट सुन्नु परिवर्तनको संकेत भएको उनीहरूको भनाइ छ।

किसानहरूले यो भेटलाई केवल औपचारिक कार्यक्रम मात्र नभई विश्वास र अपेक्षाको प्रमाणका रूपमा लिएका छन्। मन्त्री पारियारले व्यक्त गरेको प्रतिबद्धता चाँडै व्यवहारमा रूपान्तरण हुने आशा गर्दै किसानहरूले सरकारसँग निरन्तर संवाद र सहकार्यको अपेक्षा गरेका छन्।