महेश सिंह लहान – पछिल्लो बेमौसमी वर्षाको कारण सिरहा जिल्लाका किसानहरू ठूलो संकटमा परेका छन्। धानवाली र नगदेबाली पूर्ण रूपमा नष्ट भएपछि किसानहरू विस्थापित हुने अवस्था आएको छ। किसानकाे वास्तविक अवस्था बुझी तत्काल क्षतिपूर्तिको व्यवस्था गर्न सरकारसमक्ष माग गरिएको छ।
सो माग थारु कल्याणकारी सभा, सिरहा–२२ द्वारा आयोजित एक विशेष कार्यक्रमका वक्ताहरूले गरेका हुन्। वक्ताहरूले वर्षाका कारण थारु, मधेसी र अन्य किसानहरूको खेतीपाती डुबानमा परेकाे भन्दै, किसानकाे जिविकोपार्जन नै संकटमा परेको बताए।
कार्यक्रममा वक्ताहरूले भने — “धानवाली र नगदेबाली नष्ट हुँदा किसानको आर्थिक आधार कमजोर भएको छ। यस्तो विषम परिस्थितिमा सरकारले अविलम्ब राहत र क्षतिपूर्तिको नीति ल्याउनुपर्छ।”
वक्ताहरूले कृषि क्षेत्रमा दीर्घकालीन समाधानका लागि सिँचाइ, जलनिकासी र बेमौसमी विपद् व्यवस्थापन योजना प्रभावकारी रूपमा कार्यान्वयन गर्नुपर्ने आवश्यकता पनि औंल्याए।
थारु कल्याणकारी सभाले बेमौसमी वर्षाको कारण पीडित किसानहरूलाई तुरुन्तै राहत वितरण र क्षतिपूर्तिका लागि प्रदेश तथा संघीय सरकारलाई ध्यानाकर्षण गराएको छ।
स्थानीय कृषकहरूले भनेका छन् — “हामीले वर्षभरि लगाएको पसिना पानीले बगायो, अब सरकारले हाम्रो आवाज सुन्नुपर्छ।”
Discussion about this post