लक्ष्मीपुर पतारीमा बायोमेट्रिक दर्ता कार्यक्रम, सेवाग्राहीको भिड

महेश सिंह सिरहा- सिरहाको लक्ष्मीपुर पतारी गाउँपालिकामा व्यक्तिगत घटना दर्ता तथा सामाजिक सुरक्षाका लागि बायोमेट्रिक प्रणालीमार्फत विवरण संकलन सुरु गरिएको छ। कार्यक्रम सञ्चालनमा आएसँगै गाउँपालिकामा सेवाग्राहीको उल्लेख्य चाप देखिएको छ।

गाउँपालिकाले सेवा प्रवाहलाई डिजिटल र प्रभावकारी बनाउने उद्देश्यले बायोमेट्रिक प्रणाली लागू गरेको हो। यो प्रणालीबाट जन्म, मृत्यु, विवाह, बसाइँसराईलगायतका व्यक्तिगत घटना दर्ता गरिनुका साथै सामाजिक सुरक्षा भत्ता प्रणालीलाई समेत व्यवस्थित बनाइने जनाइएको छ।

कार्यक्रमका क्रममा सेवा लिन आएका स्थानीय बासिन्दाको भीड बढ्दै जाँदा व्यवस्थापनमा केही चुनौती देखिएको छ। “सेवा लिन आउनेहरूको संख्या अत्यधिक छ, व्यवस्थापनमा अझ सुधार आवश्यक देखिन्छ,” समाजसेवी जगन्नाथ मण्डलले भने, “यस्तो कार्यक्रम गाउँपालिकाको लागि अत्यन्त उपयोगी भए पनि उचित व्यवस्थापन नभए जनतालाई सास्ती हुने देखिन्छ।”

गाउँपालिकाले भने सेवाग्राहीको चापलाई मध्यनजर गर्दै आवश्यक स्रोत साधन र जनशक्ति थप गर्ने तयारी गरेको जनाएको छ। बायोमेट्रिक प्रणालीबाट तथ्यांक अद्यावधिक भएपछि सामाजिक सुरक्षा भत्ता वितरणमा पारदर्शिता र सहजीकरण हुने अपेक्षा गरिएको छ।

स्थानीय तहमा प्रविधिको प्रयोगमार्फत सेवा प्रवाह विस्तार गर्ने प्रयासलाई स्थानीयवासीले सकारात्मक रुपमा लिएका छन्।