महेश सिंह सिरहा – गणतन्त्र स्थापना भएको १६ औँ वार्षिकोत्सवको अवसरमा सिरहा जिल्लामा आज गणतन्त्र दिवस २०८२ भव्यता र हर्षोल्लासका साथ मनाइएको छ।
जिल्ला सदरमुकाम सिरहामा आयोजित जिल्ला स्तरीय मूल समारोहको अध्यक्षता जिल्ला समन्वय समिति (जिसस) का प्रमुख दिनेश महतोले गर्नुभएको थियो। कार्यक्रममा सिरहा नगरपालिकाका प्रमुख डा. नवीन यादव प्रमुख अतिथिको रूपमा उपस्थित रहनु भएको थियो भने जिसस उपप्रमुख दिलिप लामा विशिष्ट अतिथिको रूपमा सहभागी हुनु भयो।
समारोहमा प्रमुख जिल्ला अधिकारीसहित विभिन्न सुरक्षा निकायका जिल्ला प्रमुखहरू, विभिन्न राजनीतिक दलका प्रतिनिधिहरू तथा सरकारी कार्यालयका प्रमुखहरूको उल्लेखनीय सहभागिता रहेको थियो।
कार्यक्रममा गणतन्त्रको महत्व, प्राप्त उपलब्धिहरू तथा आगामी चुनौतीहरूबारे वक्ताहरूले आ-आफ्ना धारणा राखेका थिए। गणतन्त्रले देशमा लोकतान्त्रिक अभ्यास, सामाजिक समावेशिता र नागरिक अधिकारको सुनिश्चितता गरेको भन्दै सबैले यसको सुदृढीकरणमा प्रतिबद्धता जनाएका थिए।
सांस्कृतिक प्रस्तुति, कविता वाचन र विविध कार्यक्रमहरूमार्फत गणतन्त्र दिवसलाई अझ रंगीन बनाइएको थियो।
कार्यक्रम सफलतापूर्वक सम्पन्न गर्नमा जिल्ला प्रशासन कार्यालय, सुरक्षा निकाय, स्थानीय तह, शैक्षिक संस्था तथा विभिन्न संघसंस्थाहरूको समन्वयात्मक भूमिका उल्लेखनीय रहेको आयोजक समितिले जनाएको छ।
Discussion about this post